Амбасадар Кыргызстана ў Беларусі падала ў адстаўку

• 6.09.2010, 12:06

Амбасадар Кыргызстана ў Беларусі і пастаянны паўнамоцны прадстаўнік рэспублікі ў статутных і іншых органах СНД Ішангуль Балджурава падала ў адстаўку.

Пра гэта паведамляе інфармацыйнае агенцтва 24.kg са спасылкай на ўласныя крыніцы.

Паводле дадзеных інфармагенцтва, Балджурава знаходзіцца ў дадзены момант у Кыргызстане. Заяву аб адстаўцы яна перадала 4 верасня прэзідэнту пераходнага перыяду Розе Атунбаевай асабіста.

У дыппрадстаўніцтве Кыргызстана ў Беларусі БелаПАН не змаглі пацвердзіць ці абвергнуць інфармацыю пра адстаўку амбасадара. Аднак паведамілі, што Балджурава ў цяперашні час сапраўды знаходзіцца ў Кыргызстане.

Прэс-сакратар прэзідэнта Кыргызстана Султан Каназараў таксама не валодае інфармацыяй пра магчымую адстаўку Балджуравай. «Асабіста мне пра гэта нічога не вядома», - сказаў ён БелаПАН.

У прэс-службе МЗС дадзеную інфармацыю пакуль не пацвердзілі, адзначыўшы, што пра адстаўку Балджуравай таксама даведаліся з паведамленняў у СМІ.