Настаўнікам пачатковых класаў ніхто працаваць не хоча

• 13.07.2011, 15:45

У Менску адзначаецца вялікі недахоп настаўнікаў пачатковых класаў, а таксама настаўнікаў працы.

Пра гэта паведаміў 13 ліпеня намеснік старшыні камітэта па адукацыі Менгарвыканкама Уладзіслаў Кузьмянкоў.

«Матэрыяльная зацікаўленасць, я так разумею, у гэтай праблеме займае не апошняе месца», - сказаў ён і адзначыў, што заробак настаўнікаў у вялікай ступені залежыць ад стажу.

Адным з спосабаў вырашэння праблемы недахопу настаўнікаў, лічаць у гарвыканкаме, можа быць падаўжэнне кантрактаў з настаўнікамі-пенсіянерамі. Плануецца таксама прыцягваць да працы з вучнямі малодшых класаў студэнтаў-старшакурснікаў педагагічных ВНУ. Акрамя таго, у Міністэрства адукацыі ўнесеная прапанова павялічыць набор на дашкольныя спецыяльнасці ў педагагічныя ВНУ, паведамляе БелаПАН.

Тым не менш, запэўніў ён, да новага навучальнага года ўсе кадравыя пытанні будуць вырашаныя.