Якія падарункі купляюць беларусы да Новага года

• 21.12.2017, 20:05

Беларусы ўжо на ўсю моц рыхтуюцца да галоўнага зімовага свята года.

Спецыяльна для marketing.by аналітыкі маркетплейса Deal.by паглядзелі, якія тавары карысталіся папулярнасцю ў першай палове снежня. Не здзіўляйцеся, калі пасля навагодняй вячэры знойдзеце адзін з іх пад елкай.

Хто каго: фарфоравы трусік супраць фітнес-бранзалета

Многія беларусы не ведаюць, што менавіта загарнуць у святочную ўпакоўку і пакласці пад навагоднюю елку. У снежні гэтага года ў параўнанні са снежнем мінулага ў 8 разоў павялічыўся продаж у катэгорыі «Падарункі і сувеніры», дзе можна сустрэць што заўгодна: штопар ручной працы, фарфоравага труса і камплект з шаліка і шапкі.

«Большасць людзей не ведаюць, што дарыць іншым. Кубак? Адэкалон? Падарункавы сертыфікат? Каб не мучыцца гэтымі пытаннямі, людзі ідуць у раздзел «Падарункі» ў надзеі сустрэць там нешта падыходнае. Таму мы рэкамендуем інтэрнэт-крамам ствараць асобныя раздзелы «Падарункі» і ўключаць туды тавары са свайго асартыменту. Наступны крок - рабіць сегментаваныя падборкі: падарункі для мам, тат, дзяўчат, хлопцаў і г.д.», - распавёў кіраўнік маркетплэйса Deal.by Максім Марыніч.

Тыя ж хто, ведае, які падарунак купіць, здаецца, у курсе пераваг сваіх блізкіх. У топе папулярных зімовых тавараў - эспандэры, мікрафоны, абсталяванне для манікюру і фітнэс-бранзалеты. Іх продаж у сярэднім вырас у 4 разы. У снежні павялічылася цікавасць да ахоўных плёнак і чахлоў для тэлефонаў, а таксама бранзалетак са скуры, камянёў і іншых матэрыялаў. Беларусы купілі ў 2,5 разы больш такіх тавараў, чым годам раней.

Усё лепшае - дзецям

Мацней за ўсё, у 35 разоў, выраслі анлайн-продажы цацак. Самы хадавы тавар - канструктары. На другім і трэцім месцы лялькі і інтэрактыўныя дзіцячыя цацкі.

«Дзіцячыя тавары - адна з самых папулярных таварных катэгорый у інтэрнэце, - кажа Максім Марыніч. - 12 з 20 тавараў, якія часцей за ўсё замаўлялі на Deal.by ў снежні, прызначаныя для дзяцей. Беларусы імкнуцца купляць дзецям цацкі, якія прынясуць радасць і карысць. Часцей за ўсё замаўляюць інтэрактыўныя і цацкі для развіцця: канструктары, лялькі, што размаўляюць і робаты».

Які Новы год без... карнавальнага касцюма

Любоў да дзяцей прасочваецца і ў пакупках навагодніх тавараў. Самы папулярны навагодні тавар - дзіцячыя карнавальныя касцюмы. У снежні беларусы аформілі на іх 389 замоў. За дзіцячымі карнавальнымі касцюмамі ідуць елкі, санкі і навагоднія цацкі.

Дарэчы, санак сёлета купілі на 60% менш. А вось продажы елак і навагодніх цацак засталіся на ранейшым узроўні. У першай палове снежня беларусы зрабілі ўжо 252 замоў на елкі і 176 на цацкі. Так што, Новы год сёлета будзе дакладна не горшы за папярэдні.