Відэафакт: Пасажырскі аўтобус у Слуцку знёс табло аўтазапраўкі

• 28.12.2017, 21:50

Кіроўца аўтобуса страціў прытомнасць падчас руху.

У Слуцку 28 снежня пасажырскі аўтобус урэзаўся ў табло аўтазапраўкі, піша мясцовы сайт kurjer.info.

ДТЗ адбылося а 17 гадзіне на павароце з вуліцы Максіма Багдановіча на аўтазапраўку №4 «Юнайтэд Компані».

Пасажыраў у аўтобусе ў гэты момант было няшмат. Інфармацыі аб пацярпелых пакуль няма.

Паводле папярэдняй інфармацыі, 40-гадоваму кіроўцу аўтобуса №12 стала дрэнна за стырном, і ён страціў прытомнасць. Мужчыну забрала «хуткая».

Дырэктар аўтобуснага парка №2 Мікалай Валетка ў каментарах журналістам заявіў, што кіроўца перад выездам прайшоў медкамісію і на сваё самаадчуванне не скардзіўся.