Праз запазычанасць у камунальных паслугах магілёвец пазбавіўся кватэры, у якой жыў 40 гадоў

• 29.12.2017, 21:38

Камунальныя паслугі мужчына не аплачваў блізу двух гадоў.

У Магілёве з двухпакаёвай кватэры па вуліцы Сурганава выселілі мужчыну, які меў вялікую запазычанасць па камунальных паслугах. Чалавек пражываў па гэтым адрасе з 1977 года, у свой час не скарыстаўся правам прыватызацыі жылля і цяпер быў на вуліцы.

«З 1 ліпеня 2016 года непрыватызаванае дзяржаўнае жыллё перайшло ў разрад арэнднага. Чалавек не аплачваў ні арэндную плату, ні запазычанасць за камунальныя паслугі, таму справа была перададзеная ў суд», - растлумачылі Onliner.by ў Цэнтры гарадскіх інфармацыйных сістэм Магілёва.

Камунальныя паслугі мужчына не аплачваў блізу двух гадоў. Да 1 снежня 2017 года запазычанасць назапасілася вялікая - 868,79 рубля плюс пеня ў 1212,13 рубля. Разам з мужчынам у кватэры зарэгістраваныя яго былая жонка і паўналетні сын, аднак яны доўгі час не пражываюць там і фінансава дапамагаць у аплаце запазычанасці не захацелі. Спачатку супрацоўнікі Цэнтра гарадскіх інфармацыйных сістэм спрабавалі па-добраму угаварыць неплацельшчыка разлічыцца. Затым адключылі камунальныя паслугі. Але і гэта не дапамагло.

У выніку суд вынес пастанову: дамову найму кватэры скасаваць, даўжніка выселіць без выдавання іншага жылога памяшкання.

«Гэта другі такі выпадак за апошні час у Магілёве. Крайняя мера ўжываецца, толькі калі ўсе астатнія спосабы ўздзеяння на завінавачанага не падзейнічалі», - адзначылі ў Цэнтры гарадскіх інфармацыйных сістэм.