Затрыманы намеснік галоўнага лекара Менскай абласной дзіцячай бальніцы

• 9.01.2018, 21:27

Намесніка галоўнага лекара абвінавачваюць у атрыманні хабару.

Як паведамляе УУС Менскага аблвыканкама, намеснік галоўнага лекара Менскай абласной дзіцячай клінічнай бальніцы атрымаў 1000 рублёў ад індывідуальнага прадпрымальніка. Сутнасць пытання заключалася ў прыцягненні «патрэбнага» падрадчыка для правядзення будаўніча-мантажных і аздобных прац на аб'ектах медустановы.

48-гадовы фігурант больш за сем гадоў працаваў ва ўстанове аховы здароўя.

Распачатая крымінальная справа паводле ч.1 арт.430 Крымінальнага кодэкса, згодна з якой прадугледжваецца пазбаўленне волі на тэрмін да 7 гадоў.