З даху пяціпавярхоўкі ў Горадні абрынулася люлька з будаўніком

• 28.11.2018, 21:24

43-гадовы мужчына памёр.

Трагічнае здарэнне адбылося 27 лістапада ў Горадні: падчас рамонтных работ на доме на вуліцы Курчатава загінуў чалавек.

Як піша newgrodno.by, надзвычайнае здарэнне адбылося а 10.20. З вышыні пятага паверху абрынулася будаўнічая люлька, пацягнуўшыся за сабой будаўніка, які быў на даху.

Лекары, якія прыбылі на месца здарэння, канстатавалі смерць 43-гадовага мужчыны.

Паводле папярэдніх звестак, як удакладняе «Гродзенская праўда», на доме праводзілася ўцяпленне фасада. Мужчына якраз прыбіраў з даху будаўнічае смецце, калі люлька паляцела ўніз і пацягнула яго за сабой.