КНДР пагражае аднавіць ядзерную праграму

• 3.11.2018, 21:54

У Пхеньяне заявілі, што адновяць развіццё ядзернага арсенала, калі ЗША не скасуе санкцыі.

Паўночная Карэя прыстрашыла аднаўленнем развіцця ядзернага арсенала ў выпадку, калі Злучаныя Штаты Амерыкі не скасуюць эканамічныя санкцыі. Пра гэта паведамляе Deutsche Welle.

Як заявілі ў Міністэрстве замежных спраў КНДР, Пхеньян можа вярнуцца да палітыкі адначасовага стварэння ядзернага арсенала і эканамічнага развіцця.

«ЗША думаюць, што санкцыі і ціск, якія ўвесь час паўтараюцца, прывядуць да дэнуклеарызацыі. Такая думка выклікае толькі смех», - гаворыцца ў заяве паўночнакарэйскага МЗС.

Нагадаем, на сустрэчы ў чэрвені 2018 года дыктатар КНДР Кім Чэн Ын і прэзідэнт ЗША Дональд Трамп падпісалі дэкларацыю пра гатоўнасць да сумесных дзеянняў па ядзерным раззбраенні Карэйскага паўвострава.

Акрамя таго, ЗША паабяцалі Паўночнай Карэі гарантыі бяспекі.

У траўні КНДР знішчыла свой ядзерны палігон Пхунгэры, падарваўшы яго.