У Расеі прайшлі мітынгі ў падтрымку алімпійскіх спартоўцаў

• 3.02.2018, 21:48

Мітынгі былі арганізаваныя Грамадскай палатай РФ.

У многіх буйных расейскіх гарадах людзі выйшлі на вуліцы, каб узяць удзел у мітынгах-канцэртах «Расея ў сваім сэрцы», арганізаваных Грамадскай палатай. Акцыі былі прымеркаваныя да 75-годдзя заканчэння Сталінградскай бітвы, таксама арганізатары заклікалі падтрымаць спартоўцаў-алімпійцаў, якія паехалі ў паўднёвакарэйскі Пхёнчхан, а таксама тых, якія засталіся дома праз нядопуск з боку МАК, піша rbc.ru.

Першыя мітынгі пачаліся на Далёкім Усходзе. Адміністрацыя Прыморскага краю паведаміла, што ва Уладзівастоку на акцыю прыйшлі амаль 4 тысячы чалавек. У мерапрыемстве ўзялі ўдзел прафесійныя клубы рэгіёну, спартыўныя і грамадскія арганізацыі. Перад прысутнымі на сцэне выступілі бронзавы прызёр Алімпійскіх гульняў у веславанні на байдарках Георгій Цыбульнікаў і чэмпіён Сурдлімпійскіх гульняў у плаванні Віталь Абоцін. Са звестак ТАСС, акцыі прайшлі і ў іншых гарадах рэгіёну, але колькасць іх удзельнікаў невядомая.

У мітынгу «Расея ў сваім сэрцы» ў цэнтры Екацярынбурга ўзялі ўдзел 8 тысяч чалавек, паведаміў ТАСС са спасылкай на дэпартамент інфармацыйнай палітыкі Свярдлоўскай вобласці. Перад прысутнымі выступіў, напрыклад, губернатар рэгіёну Яўген Куйвашаў.

Мітынгі прайшлі і на Каўказе: у сталіцы Дагестану Махачкале, паводле звестак рэспубліканскага МУС, да акцыі далучыліся амаль 5 тысяч чалавек. Перад прысутным, выступіў чэмпіён Алімпійскіх гульняў 2012 года ў дзюдо Мансур Ісаеў. «Я як спартовец, удзельнік [Алімпіяды] разумею, наколькі сёння цяжка нашым удзельнікам. Хачу пажадаць нашым спартоўцам поспехаў, сілы і перамог», - сказаў ён.

Адная з найбуйнейшых акцый прайшла ў Грозным. Паводле звестак рэгіянальнага МУС, у акцыі «Расея ў маім сэрцы!» ўзялі ўдзел больш за 170 тысяч чалавек, паведаміў РБК прэс-сакратар УМВД у Чачні Магамед-Амін Дзяніеў. «Мы выказалі свой пратэст супраць неабгрунтаваных і незразумелых санкцый у дачыненні да Расеі, заявілі, што нашая краіна заўсёды была за мір і будзе. Вядома, мы не маглі сёння не ўспомніць і слаўныя перамогі нашых бацькоў у Сталінградскай бітве», - сказаў ТАСС старшыня федэрацыі прафзвязаў Чачэнскай Рэспублікі Хусэйн Салтагірыеў.

Улады Краснадарскага краю паведамілі, што ў рэгіёне ў акцыях у падтрымку алімпійцаў узялі ўдзел больш за 90 тысяч чалавек, у сталіцы краю Краснадары на мітынг прыйшлі 14,5 тысяч чалавек. «У акцыі ўзялі ўдзел прадстаўнікі грамадскіх арганізацый, спартыўных устаноў і клубаў, палітычных партый, Агульнарасейскага народнага фронту, грамадскіх палат Краснадарскага краю і Краснадара, навучэнцы моладзь, жыхары і госці горада», - паведамляецца на сайце адміністрацыі.

У цэнтры Сімферопаля таксама прайшоў мітынг, аднак яго галоўнай тэмай сталі антырасейскія санкцыі, распавёў ТАСС прадстаўнік арганізатараў. Акцыя на галоўнай плошчы горада сабрала звыш 10 тысяч удзельнікаў, удакладніў у размове з журналістамі намеснік старшыні савета міністраў рэспублікі Дзмітрый Палонскі.

Акцыя «Расея ў маім сэрцы прайшла і ў цэнтры Масквы, на Васільеўскім спуску. Паводле афіцыйных звестак МУС, на мітынг сабраліся 60 тысяч чалавек. Са слоў карэспандэнта, удзельнікі мітынгу прыйшлі з плакатамі Агульнарасейскага нацыянальнага фронту, Нацыянальна-вызвольнага руху, партыі «Адзіная Расея».