«Вы хочаце грамадзянскай вайны? Вы яе атрымаеце»

• 29.08.2026, 17:22

Стала вядома прозвішча маці расійскага салдата, якая прадракла бунт у звароце да Пуціна.

Тацяна Стерхова, маці аднаго з загінулых ва Украіне расійскіх вайскоўцаў, запісала эмацыйны відэазварот да Уладзіміра Пуціна, у якім абвінаваціла прэзідэнта ў забойстве свайго сына, паскардзілася на карупцыю на фронце і заявіла пра пагрозу грамадзянскай вайны.

«Я днямі пахавала сына. Што ж робіцца ў нашай Расіі? Уладзімір Уладзіміравіч Пуцін, што вы робіце? Нашых хлопцаў гробіце! Гробіце, забіваеце», — кажа жанчына на відэа, якое апублікаваў «Холад».

Паводле слоў Стерховай, яна год і восем месяцаў чакала сына. «Прывезлі без галавы, — кажа жанчына. — Дык вы што, хочаце грамадзянскай вайны? Хутка, па ўсім відаць, вы яе атрымаеце».

Паводле жанчыны, улады «нагрэлі народ», і той ужо «не хоча ісці на галасаванне». Яна скардзіцца, што не можа атрымаць «нішчымныя пахавальныя» ў 60 тысяч рублёў, бо ваенкамат патрабуе ў яе «арыгінал даведкі», які забралі, каб выдаць пасведчанне аб смерці.

«Кажуць, хутка мабілізацыя, я косткамі лягу, я не аддам свайго другога сына. Не аддам!» — крычыць жанчына. «Маці, падымайцеся, падымайцеся, — працягвае яна. — За што забіваюць нашых сыноў? Гэта здзек! Пуцін, калі ты ўсё гэта спыніш, калі ты сваіх шакалаў прыбярыш усюды і паўсюль?»

Жанчына таксама распавядае пра квітнеючую ў арміі карупцыю і камандзіраў, якія «нажываюцца», патрабуючы грошай з салдат за тое, каб не адпраўляць іх на пярэдавую або дазволіць адпачынак. «Хочаш у адпачынак — плаці! Не хочаш на пярэдак — плаці! Ды колькі ты будзеш знішчаць? Гэтыя твае шакалы, б…, афіцэр’ё е**нае, б…, будуць нажывацца на нашых сынах, на нашых слязах? Хопіць ужо, хопіць!» — крычыць жанчына.

Паводле ацэнак Цэнтра стратэгічных і міжнародных даследаванняў (CSIS), на чэрвень 2026 года расійская армія ва Украіне страціла забітымі, параненымі і зніклымі без вестак 1,4 млн чалавек. З іх не менш як 450 тысяч былі забітыя.