Блогер паспрабаваў вайсковы паёк 117-гадовай даўніны

• 14.05.2018, 21:39

Паёк часоў Англа-бурскай вайны аказаўся ядомым.

YouTube-блогер Steve1989 вядомы тым, што спрабуе пайкі розных краін свету. На днях ён наважыў паспытаць паёк брытанскага войска часоў Англа-бурскай вайны (1899 да 1902 года). На момант распакавання рацыёну споўнілася 117 гадоў, ці можна такое ўжываць у ежу?

Паёк у руках блогера складаўся з двух частак: пемікана і какава-пасты. Ён быў распрацаваны, каб падтрымліваць салдата на працягу 36 гадзін (есці яго трэба ў невялікіх колькасцях). У інструкцыі гаворыцца: «Гэты рацыён адкрываецца толькі на загад афіцэра ці ў самым крайнім выпадку», піша tut.by.

На здзіўленне, 117-гадовы рацыён быў нават ядомым. Блогер пра свае адчуванні распавёў наступнае: «Гэта як каша з мясам і злакамі. Я адчуваю тлушч і храсткі, тут ёсць печань ці нешта тыпу таго. У ежы металічны прысмак, смуродны і застарэлы. Вось гэты белы кавалак падобны да старой вены каровы, ад аднаго выгляду якога мне робіцца млосна».