«Маці 328»: У нас ёсць сілы змагацца
- 6.05.2018, 21:12
Актывісткі руху «Маці 328» галадаюць ужо 10-ы дзень.
10-ы дзень у Беларусі галадаюць актывісткі руху «Маці 328», якія дамагаюцца лібералізацыі антынаркатычнага артыкула 328 Крымінальнага кодэкса, а таксама перагляду справаў сваякоў і сустрэчы з Лукашэнкам. «Радыё Свабода» высвятляла, што адбываецца з галадоўніцамі сёння, 6 траўня.
Пухавіцкі раён, вёска Востраў
Лідарка руху Ларыса Жыгар апавяла пра сітуацыю ў лагеры галадоўніцаў у Пухавіцкім раёне:
«Тут нас галадае, як і ўчора, 7 чалавек, але ўжо вельмі цяжка і заўтра нас, напэўна, стане менш. Людміла Кулініч выйдзе з галадавання і з'едзе дадому, магчыма, яшчэ і Наталля Старавойт. Ёй ужо было дрэнна, траціла прытомнасць, будзем для яе выклікаць хуткую і думаць, што рабіць. Астатнія трымаюцца і не саступаюць».
Паводле словаў Ларысы Жыгар, штодня ў лагер прыязджаюць актывісткі руху «Маці 328», каб маральна падтрымаць галадоўніцаў.
«Вось і цяпер у нас госці. Сказалі, што 7 траўня яны збіраюцца аднесці ў адміністрацыю зварот з пытаннямі, што робяць улады, каб выканаць нашы патрабаванні», – апавяла Ларыса Жыгар.
Паводле словаў Ларысы Жыгар, да акцыі маюць намер далучыцца актывісткі ў Гародні, але колькі канкрэтна возьмуць удзел у галадаванні, яна пакуль не ведае.
Калінкавічы
6 жанчынаў прадаўжаюць галадаць і ў Калінкавічах. Пра стан здароўя апавяла Таццяна Канеўская:
«З нас ніхто раней не галадаў, не ведалі, што гэта такое. Высветлілася, горш, чым маглі ўявіць. На 10-ы дзень рэальна цяжка: слабасць, апатыя. У нас быў лекар і параілі дадаваць у ваду трохі мёду і яблычнага воцату, то мы пачалі піць такую ваду, стала лягчэй. Але зразумела, што далей лепш не будзе. Трымаемся».
Паводле словаў Таццяны Канеўскай, цяпер галадоўніцы ў Калінкавічах вызначылі для сябе мяжу – дачакацца адказу кіраўніка адміністрацыі Лукашэнкі Наталлі Кaчанавай.
Ліяна Шуба апавяла пра тое, як галадоўніцы ў Калінкавічах бавяць час.
«Адзін добры чалавек зрабіў тут тэлевізар, дык вось жанчыны глядзяць фільм, першы, на які трапілі – “Каліна чырвоная”. Гэта блізка да нашай тэматыкі, сумнай, турэмнай. Але я не гляджу, вось пішу ліст сыну ў калонію».
Паводле словаў Ліяны Шубы, ейны сын, які сядзіць у калоніі «Ваўчыныя норы» пад Івацэвічамі, ужо ведае пра галадаванне маці.
«Яго і сябра выклікалі на размову ў адміністрацыю з нагоды нашага галадавання, прычым не да сваіх міліцыянтаў, а хтосьці прыязджаў да іх. Але пра ціск дзеці не казалі. Мы адразу папярэджвалі, каб праз дзяцей на нас не ціснулі, гэта было б залішне», – сказала Шуба.
Актывісткі «Маці 328» працуюць над зваротам у Вярхоўны суд і пракуратуру Беларусі. Ідэя – заклікаць правесці пазачарговы пленум Вярхоўнага суда, на якім разгледзелі б практыку ўжывання артыкула 328.
«Гэта можа дапамагчы зніжэнню тэрмінаў і ў нашых справах, бо змены, якія пакуль прапануюцца для карэктавання дзейнага артыкуле 328, будуць тычыцца толькі новых справаў, а нам гэтага недастаткова», – мяркуе Шуба.
Віцебск
У Віцебску чацвёрты дзень трымае галадаванне Наталля Шарыпa. Жанчына апынулася адзінай у горадзе, хто адважыўся на такую акцыю пратэсту.
«Усіх так запалохалі, што нават не тэлефануюць», – паведаміла Наталля пра сябровак, якія раней не выключалі, што далучацца да галадавання.
Заўтра Наталля збіраецца спыніць галадоўку, бо запланавала выхад у горад і наведванне шэрагу ўстановаў.
«Пайду ў КДБ, у аблвыканкам, да памочніка Лукашэнкі і ў тэлефонную кампанію МТС, што абслугоўвае мой мабільнік. Хачу іх спытаць, на якой падставе праслухоўваюць мой тэлефон – хіба я нейкая злачынца?» – абураецца Наталля Шарыпа.
Пра стан здароўя актывістка сказала: «Слабасць ёсць, так, але ёсць і сілы змагацца».