Фанат, якога ўдарыў расейскі рэпер у Менску: Мне яго штаны наогул ніяк не патрэбныя

• 7.05.2018, 21:49

Пацярпелы распавёў пра канфлікт з рэперам падчас канцэрту.

У пятніцу ў Менск з канцэртам прыязджаў 22-гадовы расейскі рэпер Pharaoh. У нейкі момант у спевака і фаната, які стаяў ля сцэны, здарыўся канфлікт. Рэпер перакінуўся з наведвальнікам некалькімі фразамі, а потым паспрабаваў штурхнуць яго нагой са сцэны.

Са слоў наведвальнікаў канцэрту, канфлікт здарыўся праз тое, што хлопец, які стаяў ля сцэны, спрабаваў ухапіцца за артыста і зняць з Глеба Галубіна (Pharaoh) які-небудзь прадмет адзення. Рэперу такія паводзіны фаната не спадабаліся.

У пацярпелага хлопца трохі іншая версія таго, што адбылося. Ён пацвердзіў tut.by, што расшпіліў рэперу Pharaoh кішэню - але сцягваць штаны, як пішуць у сацыяльных сетках і СМІ, не планаваў.

- Мне яго штаны наогул ніяк не патрэбныя, - сказаў пацярпелы хлопец Ілля.

На пытанне, навошта расшпільваць кішэню артысту, адказаў сустрэчным пытаннем.

- А навошта скакаць мне па руках?

Ілля кажа, што ў нейкі момант у яго дастаткова моцна зацяклі рукі - ён паклаў іх на сцэну. Рэпер закрануў далоні, калі перамяшчаўся па сцэне. Ілля ў адказ паспрабаваў неяк адпомсціць - і расшпіліў кішэню. Артысту гэта не спадабалася.

Пацярпелы маладзён кажа, што цяпер з ім усё ў парадку. Звяртацца ў бальніцу хлопцу не давялося.

- Хіба праз пару сінякоў варта ехаць у бальніцу? - задае рытарычнае пытанне ён і дадае, што ўжо пасля канцэрту яму «дасталося па целе». - Твар я ўжо наважыў закрыць ручкамі.

Малады чалавек не плануе адмаўляцца ад наведванняў наступных канцэртаў Глеба Галубіна ў Менску. Аджартоўваецца: «Трэба ж адыграцца».