Санкцыі ЗША абвалілі турэцкую ліру да гістарычнага мінімуму

• 2.08.2018, 21:40

Эскалацыя супрацьстаяння можа прывесці да адтоку капіталу з Турцыі.

Каціроўкі турэцкай грашовай валюты ліры ўпалі да рэкордна нізкага ўзроўню пасля таго, як ЗША з 1 жніўня ўвялі санкцыі ў дачыненні да двух міністраў прэзідэнта Рэджэпа Таіпа Эрдагана ў справе амерыканскага пастара, які абвінавачваецца ў падтрымцы тэрарызму ў Турцыі, паведамляе «Европейская правда» са спасылкай на Reuters.

Таргі адлюстравалі занепакоенасць інвестараў, якая расце з нагоды напружанасці ў стасунках са Злучанымі Штатамі, хаўруснікамі па NATO і асноўным гандлёвым партнёрам Турцыі. Ліра дасягнула рэкордна нізкіх суадносін да даляра ЗША (5,0934 ліры за даляр), аднавіўшыся да адзнакі 5,06018.

«Наступная эскалацыя супрацьстаяння можа прывесці да далейшага адтоку капіталу і негатыўна паўплываць на давер да эканомікі», - сказаў Якаб Крыстэнсэн, кіраўнік даследавання рынкаў Danske Bank.

«Гэта адна з ключавых рызык для Турцыі, але ў іх таксама ёсць глыбінныя структурныя слабасці ў эканоміцы, якія ўзмацняюць гэтыя геапалітычныя праблемы», - дадаў ён.

Ліра страціла пятую частку свайго кошту з пачатку года з прычыны росту інфляцыі і занепакоенасці з нагоды незалежнасці Цэнтральнага банка перад тварам неаднаразовых заклікаў Эрдагана да зніжэння працэнтных ставак.

Міністэрства фінансаў ЗША ўвяло санкцыі супраць міністра юстыцыі Турцыі Абдулхаміта Гюля і міністра ўнутраных спраў Сулеймана Сойле за іх дачыненне да арышту і затрымання пастара Эндру Брансон. Санкцыі прадугледжваюць, што любую маёмасць або маёмасныя інтарэсы абодвух міністраў у рамках юрысдыкцыі ЗША заблакаваныя і амерыканскім грамадзянам цалкам забаронена праводзіць любыя аперацыі з імі.