У РФ згубілі прэм'ер-міністра Мядзведзева

• 23.08.2018, 20:05

Мядзведзеў дзевяць дзён не з'яўляецца на запланаваныя мерапрыемствы.

Прэм'ер-міністр РФ Дзмітрый Мядзведзеў знік, яго не бачылі ўжо дзевяць дзён. Пра гэта піша выданне «Праект» са спасылкай на крыніцы ў Белым доме, паведамляе «Дождь».

Тры крыніцы выдання ва ўрадзе кажуць, што «ніхто не разумее, у чым прычына». Пры гэтым удакладняецца, што Мядзведзеў не ў адпачынку - у яго графіку шмат мерапрыемстваў, але ўсе яны скасоўваюцца без тлумачэння прычын.

Апошні раз Мядзведзеў з'яўляўся на публіцы 14 жніўня - у гэты дзень ён сустракаўся з в. а. губернатара Новасібірскай вобласці Андрэем Траўнікавым. У наступныя дні на сайце ўрада пісалі толькі пра тое, што Мядзведзеў накіроўваў тэлеграмы за мяжу і ў рэгіёны.

21 жніўня прэм'ер павінен быў сустрэцца з Магаданскім губернатарам і правесці нараду па бюджэце, а на 23 жніўня ў яго ў графіку пасяджэнне ўрада і яшчэ адна нарада па бюджэце. Ніводнае з гэтых мерапрыемстваў не адбылося. Акрамя таго, Мядзведзева не было на пасяджэнні Рады бяспекі 22 жніўня. Запрошаныя на адну з нарад чыноўнікі чакалі Мядзведзева паўтары гадзіны, а потым ім сказалі разыходзіцца, распавяла крыніца, блізкая да ўрада.

Выданне падкрэслівае, што і на наступным тыдні ў графіку Мядзведзева шмат мерапрыемстваў, у тым ліку сустрэча з віцэ-прэм'ерамі і нарады па бюджэце. Мядзведзеў некалькі дзён з невядомай прычыны быў не ў Маскве, з наступнага тыдня ён павінен вярнуцца да актыўнай працы, дадаў суразмоўца.

У жніўні мінулага года на працягу тыдня на публіцы не з'яўляўся прэзідэнт РФ Уладзімір Пуцін. Пры гэтым на сайце Крамля публікаваліся матэрыялы аб праведзеных сустрэчах прэзідэнта РФ.