Багдан Ярэменка: Украіна павінна адмовіцца ад палітычных кантактаў з уладамі Беларусі на ўсіх узроўнях

• 27.08.2018, 20:34

Украіна не мае права ігнараваць цынічнае і шакавальнае парушэнне правоў чалавека і ціск на свабоду слова ў Беларусі.

Дырэктар фонду «Майдан замежных спраў», кіраўнік Кіеўскай арганізацыі партыі «УКРОП» Багдан Ярэменка пракаментаваў забарону выезду з Беларусі фігурантам «справы БелТА».

«У Беларусі пецярым журналістам забаранілі выезд з краіны.

Звычайна з надуманых прычын. Ведама, як сродак ціску на рэшткі свабоды, думкі і мыслення ў нашай суседняй краіне.

Сталінізм, гітлерызм, дэспатызм - называйце як хочаце - усе азначэнні будуць правільнымі. З пункту гледжання палітычных правоў і свабоды слова Беларусь ператварылася ў канцлагер.

У Кіеве сабраліся на нараду кіраўнікі ўсіх дыпламатычных устаноў Украіны - вяршкі ўкраінскай дыпламатыі.

Перакананы, што асабліва ў гэты час украінская дыпламатыя не мае права праігнараваць або абысці ўвагай чарговае цынічнае і шакавальнае парушэнне правоў чалавека і ціск на свабоду слова ў Беларусі.

Адной з формаў рэакцыі павінна быць адмова ад палітычных кантактаў з беларускімі ўладамі на ўсіх узроўнях да поўнага аднаўлення «статус кво».

Спадзяюся, што паважаны сход дыпламатаў не стане прычынай для МЗС Украіны не займацца замежнай палітыкай», - напісаў Багдан Ярэменка на сваёй старонцы ў «Фэйсбуку».