Жыхары Горак пратэстуюць супраць планаў чыноўнікаў
- 3.08.2018, 21:34
У Горках збіраюцца ўшчыльняць жылую забудову, але людзі з гэтым не згодныя і гатовыя змагацца.
На тэрыторыі акадэмгарадка, на невялікай пляцоўцы ўнутры сфармаванага мікрараёна, хочуць пабудаваць дзесяціпавярховы дом. Жыхары прылеглых гмахаў катэгарычна супраць, піша сайт horki.info.
"Хуткая" пад'ехаць не можа"
Жыхары дома №30 па праспекце Інтэрнацыянальны звярнуліся да журналістаў. Яны шакаваныя навіной - насупраць іх дома збіраюцца ўзвесці шматпавярховік.
- У нас - 216 кватэр, гэта амаль што невялікі аграгарадок. Пры гэтым побач няма мінімальнай інфраструктуры для зручнасці жыхароў. Жывём без дзіцячай пляцоўкі і без паркоўкі для аўто. Машыны ставіць няма куды, таму адна паласа дарогі ў нашым двары ўвесь час занятая. Гэта вельмі нязручна, асабліва ў гадзіны розруху і зімой, калі ляжыць снег. Бывае так, што хуткая дапамога не можа пад'ехаць да пад'езда і, калі трэба шпіталізаваць чалавека, то насілкі з пацыентам даводзіцца несці уздоўж дома. Калі пачнецца будоўля, яшчэ дадасца грузавы транспарт, - абураюцца суразмоўцы.
Людзі паведамілі, што ў пачатку дзевяностых, калі іх дом быў здадзены, дзіцячая пляцоўка была добраўпарадкавана і размяшчалася на тым месцы, дзе цяпер прадугледжваецца новае будаўніцтва.
Бацькам і дзецям было зручна: альтанкі, арэлі, пясочніцы, лаўкі для адпачынку - усё, як трэба. За 25 гадоў усё паступова прыйшло ў непрыдатнасць і некуды знікла, цяпер дзецям няма дзе гуляць і яны бегаюць па праезнай частцы.
Перажываюць жыхары раёна і за невялікі гай, які пасаджаны непадалёк па плане азелянення мікрараёна. Калі пачнецца будоўля, дрэвы наўрад ці хто будзе вартаваць.
Усе асцярогі і аргументы людзі выклалі ў заяве і накіравалі яе ў Горацкі выканкам. Пад дакументам за адзін дзень падпісалася больш за паўсотні чалавек.
"Свабоднай зямлі няма"
З райвыканкама прыйшоў адказ. У ім сказана, што на 2019 г. у Горках запланавана будаўніцтва 80-кватэрнага жылога дома. Свабодныя зямельныя ўчасткі для ўзвядзення адсутнічаюць, таму было вырашана ўшчыльняць тыя, што ўжо ёсць.
У дакуменце пазначана, што праектны інстытут вырабіць усе неабходныя разлікі, каб зразумець, ці можна ставіць дзесяціпавярховы дом у цэнтры мікрараёна ў адпаведнасці з патрабаваннямі нарматыўна-прававых актаў Беларусі.
Удакладняецца, што пры распрацоўцы праектна-каштарыснай дакументацыі будуць прадугледжаны супрацьпажарныя праезды, дзіцячая пляцоўка і дадатковыя парковачныя месцы.
Калі тэхнічныя патрабаванні немагчыма будзе выканаць, дом у гэтым месцы Горак не з'явіцца.
У адказе пазначана, што ў Магілёўскім аблвыканкаме на горадабудаўнічым савеце будуць падведзены вынікі грамадскага абмеркавання з нагоды гэтай будоўлі.
Прыняўшы да ведама адказ горацкіх чыноўнікаў, жыхары акадэмгарадка адправілі зварот у аблвыканкам на імя старшыні Уладзіміра Даманеўскага. На гэты раз ліст падтрымалі жыхары шасці шматкватэрных дамоў.
У заяве эмоцый мала. Відаць, што да праблемы падключыліся спецыялісты: ёсць спасылкі на асноўныя патрабаванні і нормы, якія павінны быць улічаны пры будаўніцтве.
Аргументы супраць узвядзення новага дома выкладзены па пунктах, вось галоўныя:
- недахоп сонца для будынкаў і тэрыторый забудовы (дамы будуць стаяць занадта блізка адзін да аднаго);
- будзе менш месцы для паркоўкі, пляцовак для адпачынку і зялёных прастор;
- вырасце загазаванасць (транспарту стане больш).
Людзі пераканаўча просяць замест грандыёзнай будоўлі ўладкаваць гульнявую дзіцячую пляцоўку і месцы для паркоўкі. Зноў нагадваюць, што ў 1990-х гадах зона адпачынку была, але паступова арэлі, альтанкі і пясочніцы зламаліся, і не былі адноўлены.
Прыводзяць нормы: для 216-кватэрнага дома павінна быць не менш за 50 парковачных месцаў, а іх цяпер усяго дзевяць-дзесяць. Людзі ўпэўненыя, што становішча толькі пагоршыцца, калі пачнецца будаўніцтва вышыннага дома на пляцоўцы памерам 38 на 50 м.
Супраць новага будаўніцтва жыхары дамоў №30 і 32, а таксама іншых выказаліся не толькі ў калектыўным лісце, але і на сходзе, які прайшоў з удзелам намесніка старшыні Горацкага райвыканкама Андрэя Камко і галоўнага архітэктара раёна Сяргея Котава.
Людзі звяртаюць увагу чыноўнікаў на ходнік каля пад'ездаў да дома №30, які патрабуе рамонту ўжо шмат гадоў. А яшчэ яны перакананыя: недапушчальна вырашаць чыесьці праблемы за кошт ушчамлення тых, хто ўжо многія гады жыве ў гэтым мікрараёне.