«Плачу кожны месяц за тэлефон, інтэрнэт і не магу імі карыстацца»
- 5.08.2018, 20:10
Жыхароў Слоніма пакідаюць без электрычнасці ўжо трэці тыдзень.
У Слоніме на вуліцы Сінічкін і вуліцы Зялёнай Слонімскі РЭС праводзіць рэканструкцыю і капітальны рамонт электрасетак, што, як высветлілася, стварае нязручнасці жыхарам гэтых вуліц, піша «Газета Слонимская».
Са слоў людзей, яны вымушаныя абыходзіцца без электрычнасці па восем гадзін у дзень. Адключаюцца халадзільнікі, размарожваюцца прадукты, не працуюць тэлевізары, тэлефоны, няма інтэрнэту, і такая сітуацыя цягнецца амаль два тыдні. Людзі стаміліся трываць гэтыя нязручнасці і звярнуліся да журналістаў.
- Слонімскі РЭС нас пакінуў без электрычнасці ў сезон нарыхтовак. Яны нас папярэдзілі пра тое, што будуць праводзіцца рамонтныя работы, разаслаўшы SMS-паведамленні. І вось ужо на працягу амаль двух тыдняў у нас кожны дзень на восем гадзін адключаюцца ў дамах электрапрыборы, - наракала на сітуацыю жанчына, якая жыве на вуліцы Сінічкін.
- Я два маразільнікі запоўніла ягадамі, столькі было працы ўкладзена, бо ягады трэба было сабраць, перабраць, памыць, перапрацаваць, расфасаваць і скласці ў маразільнік. А цяпер цэлы дзень няма святла, усе прадукты размарожваюцца. Выходзіць, што ўся мая праца была марная? І мне ніхто не дасць грошы, каб я купіла прадукты. РЭС дасылаў нам у SMS-паведамленнях, што прыносіць свае прабачэнні за нязручнасці, але, прабачце, нязручнасці - гэта калі адключаюць электраэнэргію на гадзіну-дзве, але не на восем гадзін на працягу двух тыдняў, - абурана выказвала сваю незадаволенасць іншая жанчына.
Каб праясніць сітуацыю, журналісты патэлефанавалі ў Слонімскі РЭС, дзе спецыяліст пракаментаваў сітуацыю наступным чынам:
- На вуліцы Сінічкін і Зялёнай вядзецца рэканструкцыя і капітальны рамонт электрасетак: мяняюцца старыя апоры і ставяцца новыя.
- Гэта стварае шэраг нязручнасцяў жыхарам гэтых вуліц.
- Мы ўкладваем свае грошы для таго, каб людзі зімой і ў астатні час адчувалі сябе нармальна, мелі электразабеспячэнне. Трэба пацярпець. Я памятаю, у маё дзяцінства нас па два тыдні адключалі ад электраэнэргіі, калі ставілі новыя апоры.
- Прабачце, у якім стагоддзі было ваша дзяцінства?
- У ХХ стагоддзі. Мы адключаем святло толькі на дзень і ўсталёўваем апоры.
Размова праходзіла па гучнай сувязі, і адна з жанчын, якія прысутнічалі ў гэты час у рэдакцыі, не вытрымала і ўступіла ў дыялог са спецыялістам РЭСа.
- На які дзень? Ужо толькі на гэтым тыдні чацвёрты дзень няма святла, - спрабавала данесці жанчына.
- На ноч святло ўключаюць? - пацікавіўся спецыяліст.
- Святло адключаюць з 9.00 да 17.00. Восем гадзін не працуе ў доме электраабсталяванне. Хто нам заплаціць за лядоўні, якія могуць выйсці з ладу, бо яны кожны дзень адключаюцца?
- Скажыце, а вы людзей загадзя паведамілі пра тое, што будуць праводзіцца рамонтныя работы?
- Так, усіх апавясцілі.
- Мне ні адной эсэмэскі не прыйшло. Я пенсіянерка і не магу аплачваць нават такія элементарныя паслугі.
Нам працоўныя сказалі, каб мы не расслабляліся, бо працы будуць праводзіцца на працягу месяца. Гэта значыць, што 160 гадзін мы павінны знаходзіцца без электрычнасці. Я плачу кожны месяц за тэлефон, інтэрнэт і не магу імі карыстацца. У мяне мама ў шаноўным узросце, у яе кепскі зрок, яна не можа чытаць, таму інфармацыю атрымлівае толькі з тэлевізара. І я хацела б даведацца, хто нам заплаціць за сапсаванае абсталяванне і прадукты?
- Згодна з правіламі электразабеспячэння, мы маем поўнае права адключаць электраэнэргію і праводзіць рамонтныя работы.
- У мяне праблема, што я знаходжуся без святла.
- На які час?
- На час рамонту. А калі вы чагосьці не разумееце, то гэта вашы праблемы.
Пасля гэтых слоў на іншым канцы дроту пачуліся гудкі.
Пасля размовы журналісты ператэлефанавалі спецыялісту і папрасілі прадставіцца, аднак пачулі наступнае:
- Справа ў тым, што мы з вашай газетай не працуем, таму ніякай інфармацыі вам даваць не будзем.
На двары XХI стагоддзе, але, выходзіць, іншага спосабу рэканструкцыі электрасетак пакуль не прыдумалі. Таму жыхарам гэтых вуліц давядзецца ў 30-градусную спякоту абыходзіцца без святла, напэўна, яшчэ некалькі тыдняў.