У якіх гарадах свету ёсць вуліцы ў гонар Беларусі?

• 17.09.2018, 21:22

Высвятляецца, вуліцы, названыя ў гонар нашай краіны, ёсць у многіх гарадах свету.

Пры гэтым гаворка ідзе не толькі пра дзяржавы СНД, дзе такія найменні натуральныя, але і пра краіны далёкага замежжа.

Як высветліў belmir.by, карыстаючыся картаграфічным сэрвісам Google Maps, вуліцы, якія маюць у сваіх назвах слова «Беларусь» або «Менск», існуюць у ЗША, Вялікабрытаніі, Італіі, Бразіліі, Тунісе, Гішпаніі, Славакіі, ПАР і ААЭ.

Ужываючы толькі некалькі еўрапейскіх моў і ведучы пошук практычна наўздагад, мы змаглі знайсці амаль два дзясяткі такіх найменняў. У ангельскім горадзе Арандэл выявіўся нават Belarus Close, што немілагучна перакладаецца як Беларускі тупік.

Google, вядома, мог недзе і памыліцца, але ў некаторых выпадках на ўказальніках і дамах сапраўды выразна бачныя таблічкі: «Via Bielorussia», «Belarus Lane», «Ulica Bieloruská»...

Цікава, што часцяком «нашы» вуліцы суседнічаюць з вуліцамі, названымі ў гонар іншых краін. Напрыклад, у гішпанскім горадзе Альмера побач з Calle Bielorrusia знаходзяцца праспект Еўропы, вуліцы Даніі, Балгарыі, Грэцыі, Аўстрыі, Францыі і гэтак далей.