Што паглядзець пілігрымам з Беларусі ў Вільні, падчас візіту папы рымскага

• 8.09.2018, 21:10

Праграма візіту айца ўсіх каталікоў насычаная.

22 верасня самалёт Alitalia з папам рымскім прызямліцца ў міжнародным аэрапорце Вільнюса. Там жа адбудзецца ўрачыстая цырымонія прывітання Пантыфіка, пасля якой ён выправіцца на сустрэчу з прэзідэнткай Літвы спадарыняй Даляй Грыбаўскайтэ і прадстаўнікамі органаў улады, грамадзянскай супольнасці, дыпламатычнага корпуса, паведамляе «Брестская газета».

Візіт папы рымскага ў Літву – другі ў гісторыі. Пасля аднаўлення незалежнасці, 4–8 верасня 1993 года, краіну наведаў вялікі пілігрым – папа Ян Павел II. Прайшло роўна 15 гадоў!

Праграма знаходжання айца ўсіх каталікоў насычаная: ужо ў другой палове дня папа Францішак наведае віленскі санктуарый Маці Божай Вастрабрамскай, дзе памоліцца перад цудатворным абразом Багародзіцы, напісанай у першай палове XVII ст. Гэты вобраз мае глыбокую і цудоўную гісторыю, з даўніх часоў аб'ядноўвае вернікаў усіх народаў і канфесій. Потым Пантыфік пяройдзе на Кафедральны пляц, дзе сустрэнецца з моладдзю.

Сакральная спадчына Вільні надзвычай моцная. На вулачках Старога горада ярка прадстаўлены асноўныя хрысціянскія канфесіі – тут размешчаныя малельныя дамы каталіцкай, расейскай праваслаўнай, лютэранскай і грэка-каталіцкай цэркваў. Цікавасць беларускіх паломнікаў, безумоўна, прывабіць жыццёвы шлях Язафата Кунцэвіча, які 400 гадоў таму пачаў працу для аб'яднання каталіцкай і праваслаўнай цэркваў. Кунцэвіч актыўна абараняў і ўмацоўваў праваслаўныя супольнасці, а таксама аднавіў адзінства з Рымам. У 1867 г. стаў першым уніяцкім святым, ён пахаваны ў саборы Св. Петрa ў Рыме, а мошчы шануюцца ў розных месцах Літвы, Польшчы і Беларусі.

Вялікай папулярнасцю ў паломнікаў карыстаецца кафедральны сабор-базіліка Святога Станіслава і Святога Уладзіслава – самы важны каталіцкі храм краіны, сімвал хрышчэння Літвы.

У сутарэннях захаваліся найстаражытнейшы каменны мур XIII–XV стагоддзяў і напісаная ў XIV стагоддзі найстаражытнейшая літоўская фрэска, на якой намаляванае распяцце Хрыста. У Кафедральным саборы знаходзіцца адзін з найкаштоўнейшых узораў ранняга барока – капліца Св. Казіміра, дзе захоўваецца труна з мошчамі святога, які ўважаецца заступнікам Літвы. У гэтым жа храме знаходзіцца цудадзейны абраз Найсвяцейшай Панны Марыі (Мадонны Сапегскай), адзін з самых ранніх увянчаных папскімі каронамі вобразаў Марыі ў Еўропе (1750 г.).

Яшчэ адна святыня – касцёл Святога Духа, адзін з самых прыбраных храмаў горада: элементы дэкору ў стылі ракако, шаснаццаць алтароў, цудоўны арган XVIII ст., створаны майстрам Адамам Готлібам Каспарыні, і 45 карцінаў, прызнаных помнікамі мастацтва. З 1986 да 2005 года ў гэтым касцёле знаходзіўся асабліва паважаны вернікамі вобраз Міласэрнасці Божай. Гісторыя касцёла захоўвае мноства таямніц як у самім будынку, так і ў сутарэннях храмавага ансамбля – тут знайшлі супакой многія жыхары горада, ахвяры войнаў і эпідэмій.

Як правіла, паломнікі не абмінаюць таксама храм Міласэрнасці Божай, дзе знаходзіцца абраз Міласэрнасці Божай. Галоўная рэліквія ў цэнтральным алтары – цудатворны абраз Езуса Міласэрнага («Езус, спадзяюся на Цябе»), напісаны мастаком Эўгеніюшам Казіміроўскім у 1934 годзе на ўказанне манашкі Фаўстыны Кавальскай, якой гэты вобраз з'явіўся ў бачанні.

Абраз паказвае Езуса ў белым адзенні, Ён стаіць з узнесенай у добраславенні правай рукой і з левай рукой, якая паказвае на сэрца; з сэрца выходзяць уніз чырвоны і блакітны прамяні.

На другі дзень свайго знаходжання ў Літве папа накіруецца ў Каўнас: у мясцовым парку Santakos узначаліць нядзельную св. Імшу, якая закончыцца супольнай малітвай «Анёл Панскі». На другую палову дня запланаваная сустрэча са святарамі, законнікамі і семінарыстамі ў кафедральным саборы Каўнаса. Закончыцца афіцыйная праграма літоўскага этапу падарожжа па Прыбалтыцы наведваннем віленскага Музея акупацыі і барацьбы за свабоду і кароткай малітвай пра ўсіх ахвяраў вайны.

Спектр помнікаў рэлігіі, гісторыі і архітэктуры Вільні настолькі разнастайны, што кожны вернік зможа знайсці святыню, якая прызначаная менавіта яму і з якой узнікае нябачная, але вельмі трывалая сувязь. Візіт папы рымскага Францыска – цудоўная нагода яшчэ раз пакланіцца святым вобразам літоўскай сталіцы. Нагадаем, што дэвіз візіту папы рымскага – «Ісус Хрыстос – наша надзея». Гэтыя словы настройваюць людзей глядзець у будучыню з верай і аптымізмам.