Намеснік міністра ўнутраных спраў: Можа, і трэба папрасіць прабачэння перад цыганамі. Не ведаю, ці будзем

• 21.05.2019, 13:41

Цыган затрымлівалі ва ўсёй Беларусі.

Служба ўласнай бяспекі МУС праводзіць службовае разбіральніцтва аб факце гібелі супрацоўніка МУС Яўгена Патаповіча ў Магілёве, паведаміў першы намеснік міністра ўнутраных спраў Іван Падгрускі. Аб гэтым паведамляе «Радыё Свабода».

На пытанне журналістаў, ці не думае ён, што МУС павінна папрасіць прабачэння перад цыганамі, якіх масава затрымлівалі ў Магілёве пасля смерці супрацоўніка ДАІ, Падгрускі адказаў: «Магчыма, і трэба. Не ведаю, ці будзем».

Увечары 16 траўня ў Магілёве затрымалі блізу сотні жыхароў двух цыганскіх раёнаў горада. Жанчын адпусцілі на наступную раніцу, а мужчын трымалі да нядзелі. Пасля вызвалення яны распавялі журналістам, што міліцыянты выпытвалі, хто з прадстаўнікоў цыганскай дыяспары датычны да забойства міліцыянта Яўгена Патаповіча. Пры затрыманні і на допытах іх білі.

У Міністэрстве ўнутраных спраў сказалі, што «нічога не ведаюць» пра сотню затрыманых цыганоў у Магілёве.

Са слоў старшыні грамадскага аб'яднання «Беларуская дыяспара цыган» Алега Казлоўскага, затрыманні былі не толькі ў Магілёве: да цыганаў прыходзілі міліцыянты ва ўсіх рэгіёнах Беларусі. Да самога старшыні дыяспары двойчы прыходзілі з нагоды забойства Яўгена Патаповіча.

«Яны паднялі ўсе сілы МУС, - сказаў Казлоўскі. - У Калодзішчах быў аўтобус АМАПу. Затрымлівалі ў Віцебску, у Гомелі пагалоўна - ва ўсёй краіне».