Трамп абвінаваціў Кітай у маніпуляцыі валютай пасля падзення курсу юаня

• 5.08.2019, 20:55

Кітайскі Народны банк апусціў курс юаня да мінімуму за дзесяцігоддзе.

Прэзідэнт Злучаных Штатаў Амерыкі Дональд Трамп абвінавачвае Кітай у маніпуляцыі валютай на фоне гандлёвай вайны краін. Пра гэта ён напісаў у сваім Twitter.

Адзначым, кітайскі Народны банк наважыў апусціць курс да мінімуму за дзесяцігоддзе.

«Кітай апусціў кошт сваёй валюты амаль да гістарычнага мінімуму. Гэта называецца «маніпуляванне валютай». Вы чуеце, Федэральны рэзерв? Гэта сур'ёзнае парушэнне, якое з часам моцна аслабіць Кітай», - пракаментаваў амерыканскі лідар.

Так, у панядзелак, 5 жніўня, падчас таргоў курс юаня ўпаў да мінімальнага за дзесяцігоддзе ўзроўню. Падчас таргоў курс кітайскай валюты патаннеў на 1,3%, да 7,0292 юаня за даляр. Упершыню з 2008 года кітайская валюта прабіла псіхалагічна важную адзнаку ў 7 юаняў за даляр. Гэта здарылася пасля таго, як Народны банк КНР устанавіў сярэдні абменны курс на ўзроўні 6,9225 юаня за даляр.