Як вырастуць за год камунальныя плацяжы ў сталічнай «аднапакаёўцы»

• 11.05.2020, 21:15

Падаражэлі гарачая вада і ацяпленне.

У Беларусі з 1 чэрвеня падаражэла ацяпленне і гарачая вада. Гэта другі этап пяцідаляравага павышэння коштаў на камунальныя паслугі, якое анансавалі яшчэ ў канцы мінулага года. Tut.by палічыў, як зменіцца кошт за ЖКП у сталічнай «аднапакаёўцы» і як у ёй вырасце камуналка за год.

У Беларусі ўжо некалькі гадоў запар камунальныя плацяжы даражэюць у два этапы, але не больш чым на 5 даляраў у год у разліку на тыпавую двухпакаёвую кватэру з трыма жыхарамі пры нарматыўным спажыванні імі паслуг. Першае падаражанне было 1 студзеня, тады выраслі тарыфы практычна на ўсе паслугі. З 1 чэрвеня падаражэе гарачая вада і ацяпленне. Тарыф, што субсідзіруецца, павялічыцца з 18,4831 да 20,6216 рубля за 1 Гкал.

Варта адзначыць, што для тых, хто аплачвае гарачае водазабеспячэнне і ацяпленне з эканамічна абгрунтаваных тарыфаў, цяпер квітанцыя не пацяжэе. Поўны тарыф павялічыўся з 1 студзеня з 88,99 да 92,25 рубля за 1 Гкал і да канца года расці не будзе.

Нагадаем, часцей за ўсё па эканамічна абгрунтаваных тарыфах за ацяпленне і гарачую ваду плацяць людзі, у якіх ва ўласнасці маецца адно або некалькі жылых памяшканняў, дзе не зарэгістраваны ўласнік або яго сямейнік. Таксама поўны кошт гэтых ЖКП аплачваюць у кватэрах, дзе зарэгістраваныя прыватныя ўнітарныя прадпрыемствы, або жыллё здаецца па дамове найму па днях.

Акрамя таго, планавалася, што з 1 траўня цалкам аплачваць цеплазабеспячэнне і газ будуць беларусы, якія трапілі ў «дармаедскую» базу. Аднак урад перанёс гэты тэрмін на 1 траўня 2021 года.

Мы паглядзелі, як рост тарыфаў адаб'ецца на суме ў квітанцыі за менскую «аднапакаёўку» з плошчай 33,2 квадратнага метра. Для разлікаў мы ўзялі фактычна спажытую колькасць паслуг жыхарамі кватэры ў красавіку 2019 года.

У красавіку гаспадары кватэры заплацілі 74,2 рубля. З улікам падаражэння падагрэву вады і ацяплення, скажам, у лістападзе гэтага года ім давядзецца заплаціць на 2,24 рубля больш - 76,44. Калі ж палічыць суму з улікам падаражэння ўсіх камунальных паслуг сёлета, то атрымаецца, што квітанцыя пацяжэе на 6,45 рубля. Такая ж колькасць паслуг у лістападзе 2019 каштавала 69,99 рубля.