У Кітаі заблакавалі горад з 11 млн жыхароў праз каранавірус

• 8.01.2021, 20:50

Усіх жыхароў будуць тэставаць.

Кітайскія ўлады ўвялі строгія абмежаванні ў суседняй з Пекінам правінцыі Хэбэй. У сталіцы правінцыі Шыцзячжуан з 11 мільёнамі жыхароў абвешчаны локдаўн. Карантын будзе ўведзены і ў яшчэ адным горадзе Сінтай, дзе пражывае сем мільёнаў чалавек, піша korrespondent.net са спасылкай на South China Morning Post.

Прычына абмежаванняў складаецца ва ўспышцы каранавіруснай інфекцыі.

З Шыцзячжуанам прыпыненыя транспартныя зносіны, а жыхарам рэкамендуецца не пакідаць населены пункт без неабходнасці.

У горадзе зарэгістравалі 120 новых выпадкаў COVID-19: 51 хворы і 69 бессімптомных носьбітаў каранавіруса. У Сінтае - адзін інфікаваны. У сераду, 6 студзеня, у правінцыі выявілі яшчэ 69 чалавек з каранавірусам. Усяго ж у Хэбэй зафіксавана 92 COVID-выпадку і 149 бессімптомных носьбітаў.

Улады пачалі масавае тэставанне ўсіх 11 мільёнаў жыхароў.