Барэль: Лукашэнка не дамогся сваёй мэты, і цяпер праблемы ў яго

• 13.12.2021, 20:21

Кіраўнік дыпламатыі ЕЗ – пра міграцыйны крызіс на мяжы.

Еўразвяз мяркуе, што справіўся з міграцыйным крызісам на мяжы з Беларуссю, і "цяпер праблемы ў Лукашэнкі". Пра гэта заявіў кіраўнік дыпламатыі Еўразвязу Жазэп Барэль на прэс-канферэнцыі паводле вынікаў пасяджэння Рады ЕЗ у Брусэлі, піша ТАСС.

«Праз дыпламатычныя намаганні мы змаглі спыніць праз Беларусь да межаў ЕЗ плыні мігрантаў, якія былі ашуканыя пустымі абяцаннямі. Лукашэнка не дамогся сваёй мэты, і цяпер праблемы ў яго, – сказаў ён. – Гэтая сітуацыя паказала, што мы адзіныя і можам дасягнуць вынікаў. Я задаволены».

Барэль чарговы раз падкрэсліў, што ЕЗ прадаўжае падтрымліваць беларускі народ і дэмакратычную Беларусь.