Эстонія замарозіла актывы РФ на дзясяткі мільёнаў еўраў
- 23.11.2022, 21:40
Іх прапануюць аддаць Украіне.
Эстонія замарозіла звязаныя з РФ актывы на дзясяткі мільёнаў еўраў і абмяркоўвае з ЕЗ магчымасць выкарыстання замарожанай расейскай маёмасці на карысць Украіны, паведаміла парталу ERR кіраўніца аддзела міжнародных фінансавых санкцый і прадухілення фінансавання тэрарызму Бюро звестак аб адмыванні грошай Лаўра Аўс.
«Разлічыць дакладную вартасць замарожаных актываў практычна немагчыма. Сродкі замарожаныя ў тым ліку ў крэдытных арганізацыях, фінансавых установах, на банкавых рахунках. Там гаворка ідзе прыкладна пра 11,7 млн еўраў. Другі пункт - сродкі на замарожаных рахунках папярэдняй аплаты ў Падаткова-мытным дэпартаменце. Там мы гаворым прыкладна пра 8,4 млн», - сказала яна.
Сума замарожаных актываў безупынна мяняецца, адзначае Аўс. Напрыклад, кампаніі могуць выкарыстоўваць замарожаныя сродкі для аплаты выдаткаў, неабходных для бяспечнага захоўвання "замарожаных" тавараў, такіх як хімікаты. Яшчэ больш складана ацаніць вартасць актываў прадпрыемства агулам.
Падаткова-мытны дэпартамент Эстоніі правёў больш за 35 тысяч праверак у рамках кантролю за выкананнем санкцыйнага рэжыму, было выяўлена амаль 1,3 тысячы парушэнняў. Парушэнні тычацца ў тым ліку спроб вывазу ў Расею гатовых еўраў (забаронена Еўракамісіяй), дарагой электронікі і г.д. Шмат якія тавары вяртаюцца, але даволі шмат застаецца на захоўванні або канфіскуецца.
Вядзецца абмеркаванне, ці можна частку гэтых сродкаў выкарыстоўваць для кампенсацыі шкоды Украіне, прычыненай у выніку ваенных дзеянняў. Начальніца мытнага аддзела Падаткова-мытнага дэпартамента Ээрыка Гелдна заявіла, што такія пастановы ў кожным выпадку будуць прымацца Эстоніяй супольна з іншымі дзяржавамі-сябрамі ЕЗ, бо санкцыйная палітыка Эстоніі з'яўляецца часткай санкцый Еўразвязу.