Замест адной чаргі на апастыль у МЗС зараз стаяць тры

• 29.04.2022, 21:38

Жывая чарга для іншагародніх расцягнулася на два тыдні.

Чарга па апастыль каля галоўнага консульскага ўпраўлення Міністэрства замежных спраў цяпер ператварылася ў тры чаргі, піша dev.by.

Гэта - чэргі на папярэдні запіс, на падачу дакументаў паводле папярэдняга запісу і чарга іншагародніх. Прычым папярэдні запіс вядзецца ўжо не на два тыдні, а на чатыры месяцы наперад. Цяпер запісваюць на 20 жніўня.

Жывая чарга для іншагародніх расцягнулася на два тыдні. Прычым жыхары Менскай вобласці іншагароднімі не лічацца. (Нагадаем, што, напрыклад, Мядзельскі і Любанскі раёны таксама ўваходзяць у Менскую вобласць.)

У пачатку сакавіка МЗС перапыніў прыём дакументаў на апастыль на 10 дзён. У выніку ўтварылася доўгая чарга з ахвочых пацвердзіць свае дакументы для выезду за мяжу. Для барацьбы з чаргой МЗС увяло папярэдні запіс + жывую чаргу для іншагародніх.