Ва ўкраінскай выведцы назвалі нечаканую кандыдатуру на замену Пуціну

• 13.07.2022, 7:50

Алігархі пачалі страчваць маёмасць і думаюць пра змену палітычнага курсу.

Расейская эліта пачынае разглядаць варыянты перавароту. Ідэя Пуціна пачаць поўнамаштабную вайну супраць Украіны пагражае ім татальным крахам.

Эліта расейскіх акупантаў ліхаманкава думае пра магчымую змену палітычнага курсу. Алігархі пачалі страчваць вялікую маёмасць і разумеюць, што надалей сітуацыя будзе толькі ўскладняцца.

Прадстаўнік ГУР МАУ Вадзім Скібіцкі паведаміў, што санкцыі яшчэ не ўчынілі свайго пікавага ўплыву на эканамічныя паказнікі Расеі. Пра гэта ён сказаў у эфіры нацыянальнага тэлемарафону, паведамляе 24 канал.

Разам з тым бізнэс-эліта расейцаў, звязаная з замежным капіталам, разумее, што Пуцін іх вядзе ў нікуды, таму алігархі і бізнэсмэны гатовыя разглядаць змену палітычнага курсу.

«Што да інфармацыі пра тое, што Патрушаў плануе свайго сына на замену Пуціну, то пацверджання пакуль няма. Але план увесці яго ў найвышэйшыя эшалоны ўлады ў Патрушава ёсць», – расказаў Скібіцкі.

Сакратар Рады бяспекі Расеі Мікалай Патрушаў цяпер найбольш набліжаны да Уладзіміра Пуціна. Ён палохае расейскага дыктатара сталымі змовамі і замахамі на жыццё, таму мае найбольшы давер ад Пуціна.

Патрушаў з'яўляецца выхадцам сістэмы КДБ, таму цалкам здольны плесці інтрыгі ў Крамлі. Ён таксама спадзяецца на падтрымку алігархату, які пацярпеў праз санкцыі за напад Расеі на Украіну.