Расейскія банкі пачалі масава адлучаць ад даляраў
- 29.07.2022, 20:39
Санкцыі дзейнічаюць.
Следам за найбуйнейшымі дзяржаўнымі банкамі, якія трапілі пад блакавальныя санкцыі ЗША, без магчымасцяў праводзіць разлікі ў далярах застаецца ўсё больш і больш удзельнікаў расейскай банкавай сістэмы.
Амэрыканскія Citigroup і JPMorgan з канца ліпеня рассылаюць лісты расейскім крэдытным арганізацыям аб закрыцці карэспандэнцкіх рахункаў, без якіх аперацыі ў амэрыканскай валюце немагчымыя, паведамляе Frank Media са спасылкай на топ-мэнэджараў банкаў і крыніцы, знаёмыя з сітуацыяй.
"Лісты шчасця" прыходзяць усім, хто мае рахункі ў Citi ды JPM: вынятак амэрыканскія банкі гатовы зрабіць толькі для Газпромбанка, праз які праводзяцца разлікі за газ, і структур Маскоўскай біржы, напрыклад, Нацыянальнага клірынгавага цэнтра.
Увогуле JPMorgan пакідае карэспандэнцкія рахункі толькі для некалькіх гульцоў, апавядаюць крыніцы Frank Media. Акрамя ГПБ і Маскоўскай біржы захаваць рахункі можа Юнікрэдытбанк, чые карэспандэнцкія рахункі знаходзяцца ў матчынай структуры - італійскай групе UniCredit.
Палітыка Citigroup аналагічная: ён абмяркоўвае закрыццё карэспандэнцкіх рахункаў для ўсіх, за выняткам ГПБ і Маскоўскай біржы, кажа яшчэ адзін суразмоўца Frank Media.
Закрыццё валютных карэспандэнцкіх рахункаў азначае, што ў банкаў растуць рызыкі ў валютных абавязаннях перад кліентамі, тлумачыць адна з крыніц. Перад пачаткам вайны фізічныя асобы і юрыдычныя асобы трымалі на валютных рахунках у Расеі 280,7 млрд даляраў. Пры гэтым банк можа ў кожны момант пазбавіцца валютных актываў, якімі забяспечаныя гэтыя абавязанні, з улікам таго, наколькі хутка ўзмацняюцца санкцыі.
ЦБ асцерагаецца і больш радыкальнага сцэнару - санкцый супраць Нацыянальнага клірынгавага цэнтра, у выніку якіх аперацыі з валютай не зможа праводзіць ужо Маскоўская біржа. Таргі далярам дэ-факта будуць паралізаваныя, і рубам паўстане пытанне: як вызначаць курс?
На гэты выпадак ЦБ прапрацоўвае з банкамі стварэнне платформы, куды будуць сцякацца квоты валют, а курс будзе вызначацца на падставе звестак ад 10 найбуйнейшых удзельнікаў, расказалі Forbes крыніцы, знаёмыя з пазіцыяй рэгулятара.
Для шырокай публікі гэта будзе выглядаць як "курс ЦБ", кажа адзін з іх. Але напраўду плануецца падабенства рынкавага механізму. Некаторыя банкі ўжо атрымалі схему-механізм разлікаў, расказаў суразмоўца Forbes, адзін з брокераў.
ЦБ мадэлюе розныя сцэнары з удзельнікамі рынку, бо санкцыйныя абмежаванні безупынна мяняюцца, заявілі "Інтэрфаксу" ў прэсавай службе рэгулятара.