У Беларусі не стае ўжо амаль 100 тысячаў працаўнікоў

• 13.09.2022, 19:52

Ідзем на рэкорд.

У Беларусі прадаўжае расці дэфіцыт кадраў. У службах занятасці зарэгістравана 98,5 тыс. вакансій. Для параўнання: на 7 верасня было адкрыта 97,3 тыс. вакансій. «Люстэрка» паглядзела, у якіх супрацоўніках маюць патрэбу наймальнікі, а таксама якімі заробкамі завабліваюць спашукальнікаў.

Крыху больш за палову вакансій – 54,4 тыс. – прапануюць заробак да 700 рублёў. Пры гэтым наймальнікі часта ўказваюць у аб'яве аб пошуку супрацоўнікаў заробак да выплаты падаткаў. Заробак большы за 1500 рублёў гатовы плаціць у 10176 вакансіях.

Так, прадаўжае расці дэфіцыт медыкаў. Для лекараў-спецыялістаў адкрыта 3969 вакансій, для медсясцёр – 3441.

Для кіроўцаў аўтамабіляў адкрыта 4038 прапановаў ад наймальнікаў, для прадаўцоў – 2207, кухараў – 1938.

Нагадаем, у Беларусі зафіксавалі новы гістарычны мінімум у колькасці занятых у эканоміцы. Зніжэнне колькасці занятых, хутчэй за ўсё, звязанае з выхадам вялікай колькасці беларусаў на пенсію, не выключана, што свой унёсак прадаўжае ўносіць міграцыя насельніцтва.