Памёр адзін з найлепшых футбалістаў свету Бобі Чарльтан

• 21.10.2023, 19:21

Яму было 86 гадоў.

У суботу, 21 кастрычніка, ва ўзросце 86 гадоў памёр легендарны футбаліст «Манчэстэр Юнайтэд» і нацыянальнай каманды Англіі сэр Бобі Чарльтан, паведамляе «Уніян» са спасылкай на афіцыйны сайт «Манчэстэр Юнайтэд».

- «Манчэстэр Юнайтэд» у жалобе праз смерць сэра Бобі Чарльтана, аднаго з самых выбітных і ўлюбёных гульцоў у гісторыі нашага клуба. Сэр Бобі быў героем для мільёнаў людзей не толькі ў Манчэстэры ці Злучаным Каралеўстве, але і ва ўсім свеце, дзе гуляюць у футбол.

Ён выклікаў захапленне не толькі сваім спартыўным майстэрствам і сумленнасцю, але і выдатнымі якасцямі футбаліста. Сэр Бобі назаўжды застанецца ў нашай памяці як гігант гульні.

Пасля заканчэння кар'еры ён працягваў з гонарам служыць клубу ў якасці дырэктара цягам 39 гадоў.

Яго беспрэцэдэнтныя дасягненні, характар і служэнне назаўжды ўвайшлі ў гісторыю «Манчэстэр Юнайтэд» і ангельскага футбола, а яго спадчына працягне жыць дзякуючы дзейнасці Фонду сэра Бобі Чарльтана, які змяняе жыццё людзей. Клуб выказвае шчырыя спачуванні яго жонцы, дочкам і ўнукам, а таксама ўсім, хто яго любіў, - гаворыцца ў паведамленні прэс-службы «Манчэстэр Юнайтэд».

Бобі Чарльтан быў выпускніком акадэміі «Манчэстэр Юнайтэд». Ён правёў 17 гадоў у клубе, згуляўшы за гэты час 758 матчаў і забіўшы 249 галоў. За нацыянальную каманду Англіі Чарльтан згуляў 106 паядынкаў і забіў 49 галоў.

Сэр Бобі з'яўляецца чэмпіёнам свету 1966 года ў складзе нацыянальнай каманды Англіі, а таксама ўладальнікам Кубка чэмпіёнаў 1968 года ў складзе «Манчэстэр Юнайтэд». У 1966 годзе ён стаў уладальнікам «Залатога мяча».

Дадамо, што Бобі Чарльтан быў адным з тых, хто выжыў у Мюнхенскай авіякатастрофе 1958 года, у якой загінулі гульцы і трэнерскі штаб «Манчэстэр Юнайтэд».