Амерыканцы ставяцца да Зяленскага лепш, чым да Байдэна і Трампа

• 26.10.2023, 21:42

Апытанне.

Апытанне The Economist / YouGov паказала, што 50% дарослых амерыканцаў станоўча ставяцца да прэзідэнта Украіны Уладзіміра Зяленскага. Пра гэта 25 кастрычніка піша Newsweek

Тое самае апытанне паказала, што толькі 42% амерыканцаў станоўча ставяцца як да прэзідэнта Джо Байдэна, так і да былога прэзідэнта Дональда Трампа.

Негатыўна да Зяленскага ставяцца 24% апытаных. Гэта больш чым у два разы менш, чым у Байдэна (55%) і Трампа (54%).

Да прэзідэнта РФ Уладзіміра Пуціна адмоўна ставяцца 80% амерыканцаў, станоўча – 9%.

40% апытаных амерыканцаў мяркуюць, што ЗША «абавязаны нешта зрабіць» у сувязі з баявымі дзеяннямі паміж Украінай і Расеяй, у той час як 38% заявілі, што ЗША не нясуць адказнасці за ўмяшанне ў канфлікт.

Апытанне праводзіцца ў сувязі з тым, што аналітыкі і чыноўнікі загаварылі пра стомленасць амерыканскага грамадства ад вайны ва Украіне. Аб'ём дапамогі, якая вылучаецца Украіне для абароны ад уварвання Расеі, таксама стаў галоўнай палітычнай тэмай для размоваў у Кангрэсе і ўсё большая колькасць кансерватыўных заканадаўцаў выступаюць супраць вылучэння Кіеву большай падтрымкі, піша Newsweek.

У час апытання было апытана 1500 дарослых амерыканцаў, хібнасць не перавышае 3,1 адсотка. Апытанне праходзіла 21–24 кастрычніка.