Куратар будаўніцтва «палаца Пуціна» нечакана памёр у турме

• 16.08.2023, 21:38

Генадзь Лапыроў на здароўе не скардзіўся.

Экс-кіраўнік Службы аховы на Каўказе ФСТ Расеі Генадзь Лапыроў памёр у папраўчай калоніі №3 у Разанскай вобласці. Пра гэта паведаміў старшыня Грамадскай назіральнай камісіі рэгіёну Віктар Бабарыкін, якога цытуе РІА «Новости».

Генадзь Лапыроў быў адказным за гарантаванне бяспекі дзяржаўных аб'ектаў на поўдні Расеі, уключаючы рэзідэнцыі прэзідэнта і прэм'ера. Ён сачыў за выдаткам сродкаў на будаўніцтва аб'ектаў на чарнаморскім узбярэжжы і кантраляваў гэты працэс. Паводле звестак крыніцаў РБК, блізкіх да Крамля, ён цесна супрацоўнічаў з сочынскімі ўладамі і ўваходзіў у склад дэлегацыі на інвестыцыйным форуме «Сочы-2012». Паводле інфармацыі Telegram-канала ВЧК-ОГПУ, генерал таксама курыраваў будаўніцтва рэзідэнцыі ў Геленджыку, якая стала вядомая пад назвай «палац Пуціна» пасля расследавання каманды Аляксея Навальнага.

У 2017 годзе Лапыроў быў асуджаны Знаменскім гарнізонным ваенным судом за хабарніцтва і незаконнае захоўванне зброі. Яго арыштавалі пры атрыманні хабару памерам 6,2 млн рублёў. Пры ператрусе ў яго знайшлі яшчэ мільярд.

Першапачатковы прысуд генералу ФСТ склаў 10 гадоў пазбаўлення свабоды і штраф памерам 150 мільёнаў рублёў. Аднак пазней прысуд быў часткова зменены Трэцім акруговым ваенным судом, і тэрмін пазбаўлення волі склаў дзевяць гадоў і восем месяцаў, а штраф знізіўся да 130 мільёнаў рублёў.

Паводле афіцыйнай інфармацыі, смерць Лапырова выкліканая хваробай. Пры гэтым асуджаны на здароўе не скардзіўся, у зняволенні не працаваў і рыхтаваўся да ўмоўна-датэрміновага вызвалення, бо ягоны тэрмін набліжаўся да канца. У панядзелак, 14 жніўня, ён нечакана звярнуўся па медыцынскую дапамогу праз праблемы з дыханнем. Спачатку яго даставілі ў Скапін, пасля чаго перавезлі ў Разанскую абласную лякарню. Лекары паставілі нечаканы дыягназ – лейкоз. Аднак усе паказнікі стану Лапырова на момант шпіталізацыі, у тым ліку ЭКГ і КТ, былі ў межах нормы.