У Мазыры жыхары арэнднага дома пераплацілі за камунальныя паслугі 90 тысяч рублёў

• 21.01.2024, 18:11

Як так выйшла.

У Мазыры жыхары арэнднага дома пераплацілі за камунальныя паслугі 90 тысяч рублёў. Падрабязнасці расказалі ў эфіры дзяржаўнай ТВ.

Паведамляецца, што ў Генеральную пракуратуру звярнуўся жыхар Мазыра з пытаннем, звязаным з аплатай арэнднага жытла. Ён адзначыў, што, згодна з рахункамі, балкон быў уключаны ў агульную плошчу кватэры.

Высветлілася, што гэтая пастанова мясцовай ЖКГ з'яўляецца незаконнай. Плошча балконаў, тэрас, лоджый, а таксама неацяпляных памяшканняў у агульную не ўваходзіць.

Са слоў жыхаркі арэнднага дома Таццяны Макаранкі, пра пераплату даведаліся летам і быў зроблены пераразлік:

- Сума 438 рублёў 11 капеек атрымалася да пераплаты.

Таццяна адзначыла, што гэта, хутчэй за ўсё, з прычыны таго, што ў тэхпашпарце была прастаўленая адна сума, у дамове найму жылога памяшкання - іншая.

Са слоў інжынера прадпрыемства “Мазырскі райжылкамгас” Ірыны Зубрыцкай, паводле вынікаў інвентарызацыі, зрабілі пераразлік залішне налічанай плошчы, сказаўшы, што гаворка ідзе пра балкон. Яна дадала, што жыхарам сродкі вярнулі на працягу 1-2 месяцаў у залежнасці ад праведзеных налічэнняў.

Парушэнні пры разліку плацяжоў камунальных паслуг былі знойдзены ў некалькіх дамах, а таксама ў сотнях кватэр. Пры праверцы пацвердзілася, што агульная плошча 290 арэндных кватэр была завышаная на 698 квадратных метраў з прычыны ўключэння ў яе склад балконаў, што супярэчыць заканадаўству.