Хлопчык вядзе папулярны TikTok па-беларуску пра жыццё ў вёсцы

• 29.01.2024, 23:39

Вучыць карміць коз, паліць печ і гатаваць дранікі.

Арсеню дзесяць гадоў, ён любіць сваю родную вёску, коз, цяля, брата, кнігі і смачна есці. А яшчэ яму падабаецца здымаць пра гэта ролікі ў TikTok, у якіх ён размаўляе на чысцюткай беларускай мове. Ну а дзясяткі тысяч задаволеных гледачоў у сваю чаргу вельмі любяць Арсеня. Прапануем палюбіць яго і вам.

У цэнтры кожнага роліка немудрагелісты, але мілы і душэўны сюжэт пра жыццё ў глыбінцы. Арсень паказвае, як падпаліць печ, як накарміць цялят ці самастойна прыгатаваць дранікі і халаднік. На выхадзе мы маем, магчыма, самы беларускі блог у інтэрнэце, піша «Онлайнер».

З вытворчасцю ролікаў Арсеню, мяркуючы з усяго, дапамагае старэйшы брат, які часта выступае аператарам. А тата хлопчыка працуе ў кацельні, якая абагравае школу і дзіцячы садок. Адзін з самых папулярных ролікаў на канале якраз пра тое, як хлопчык нясе тату «сабойку» (што можа быць яшчэ больш па-беларуску) проста на працу.

А вось вам ASMR-агляд мотаблока. Калі б у той самай Bentley былі локці - яны былі б пакусаныя да крыві.

У каментарах пад ролікамі Арсеня адбываецца сінхроннае выказванне гонару на тэму таго, як жа крута быць беларусам, і падзякі хлопчыку за тое, што ён усім пра гэта нагадвае.