Зяленскі адказаў Пуціну на словы пра легітымнасць

• 7.06.2024, 21:58

Легітымнасць кіраўніка Крамля прызнае толькі ён сам.

Прэзідэнт Украіны Уладзімір Зяленскі ў адказ на словы расейскага кіраўніка Уладзіміра Пуціна пра нібыта нелегітымнасць прэзідэнта Украіны заявіў, што легітымнасць Пуціна прызнае толькі Пуцін, а ва Украіне прэзідэнта абірае народ.

Пра гэта Зяленскі заявіў падчас супольнага выхаду да прэсы з прэзідэнтам Францыі Эмануэлем Макронам, піша «Украінская праўда».

«Легітымнасць прэзідэнта Зяленскага – прызнае выключна народ Украіны. Выбірае – народ Украіны і я вельмі ўдзячны за падтрымку. Народ у нас вольны. Мы за гэта, калі дакладна, і ваюем.

Легітымнасць "таварыша" Пуціна прызнае выключна таварыш Пуцін. І выбірае Пуціна – Пуцін. Расейскі народ – гэта дэкарацыя, а актор у іх адзін», – заявіў Зяленскі.