Міністэрства аховы здароўя расказала пра пацярпелых у жорсткім ДТЗ пад Вілейкай

• 28.07.2024, 19:38

У аварыю патрапіў легкавік і аўтобус з дзецьмі.

У Міністэрстве аховы здароўя паведамілі пра стан жанчыны-кіроўцы і яе дачкі, якія трапілі ў жорсткае ДТЗ з аўтобусам у Вілейскім раёне.

Жорсткае ДТЗ аўтобуса з 11 дзецьмі і легкавушкай адбылося пад Вілейкай. Папярэдне, аварыя здарылася таму, што кіроўца аўтобуса пайшоў на абгон малакавоза, але няўдала.

Вядома, што ў ДТЗ пацярпела кіроўца легкавушкі – 27-гадовая жанчына. У МНС раней паведамлялі, што пацярпелую давялося дэблакаваць з салона аўто. А ў Міністэрстве аховы здароўя ўдакладнілі, што жанчына за рулём легкавушкі цяжарная. Яе шпіталізавалі з папярэдне дыягнаставанымі чэрапна-мазгавой траўмамі, ударам грудной клеткі, закрытай траўмай жывата, пераломам галоўкі левай локцевай косткі і рванай ранай галёнкі.

– Пацярпелую ў аварыі пад Вілейкай цяжарную жанчыну даставілі ў Менскую гарадскую лякарню № 5, – указалі ў прэс-службе.

Акрамя таго, у аварыі пацярпела дзяўчынка 2020 года народзінаў, дачка жанчыны-кіроўцы з легкавушкі. Яе пасля агляду скіравалі на амбулаторнае лячэнне.