Кітай даў справаздачу пра вываз з Расеі рэкорднага аб'ёму прыродных рэсурсаў

• 29.07.2024, 21:30

Экспарт сыравінных тавараў у Кітай з пачатку года перавысіў $65 млрд.

Расея прадаўжае нарошчваць пастаўкі сыравінных тавараў у Кітай, паведамляюць «Ведамасці» са спасылкай на звесткі мытні КНР.

Паводле статыстыкі ўстановы, у першым паўгоддзі з РФ на кітайскі рынак было прададзена тавараў на рэкордныя $65,2 млрд – на 4% больш, чым год таму. Пры гэтым экспартная плынь амаль на 90 адсоткаў складалася з прыродных рэсурсаў.

Тры чвэрці расейскіх паставак у Кітай прыходзіліся на нафту, нафтапрадукты і газ, вынікае з мытнай статыстыкі. За паўгода нафтавыя кампаніі прадалі кітайскім НПЗ 55,1 млн тонаў «чорнага золата» – на 5% больш, чым год таму. Сярэдні кошт гэтай нафты павялічыўся на 9%, да $80,3 за бараль.

Прыбыткі ад продажу газу, які «Газпрам» пампуе ў Кітай па трубаправодзе «Сіла Сібіры», выраслі на 17%, да $4 млрд. Запушчаная ў 2019 годзе труба павінна налета выйсці на праектную магутнасць – 38 млрд, а сёлета па ёй плануецца паставіць 30 млрд кубоў газу.

Акрамя таго, Кітай набыў у Расеі драўніны на $1,7 млрд, металічных рудаў на $2,3 млрд, а таксама алюмінію і прадукцыі з яго на $1,8 млрд.

Акрамя карысных выкапняў і металаў з РФ у КНР прадавалася рыба (на $1,3 млрд), а таксама алеі ($1 млрд). Зрэшты, пастаўкі гэтых тавараў скараціліся – на 11% і 32% адпаведна.

Гістарычна Кітай імпартаваў з Расеі ў асноўным мінеральную сыравіну і нафту, супакойвае экспертка дзейнасці Агенцтва трансфармацыі і развіцця эканомікі Ксенія Баннікава. Несыравінны экспарт мог бы ўключаць прадукты харчавання, паказвае яна: так, летась атрымалася дамовіцца з Пекінам пра адкрыццё для расейскіх пастаўшчыкоў рынку свініны. Але пастаўкі ў істотных аб'ёмах, паводле мытнай статыстыкі, так і не пачаліся.

Адна з асноўных прычынаў, якая перашкаджае нарошчваць экспарт шэрагу тавараў у Кітай, – розныя абмежаванні з боку КНР, паказвае дырэктар Цэнтра эканамічнай экспертызы Інстытута дзяржаўнага і муніцыпальнага кіравання НДУ УШЭ Марсэль Саліхаў.

Пасля ўзмацнення жорсткасці амерыканскіх санкцый у канцы 2023 года кітайскія банкі сталі масава адмаўляцца ад правядзення з Расеяй, і гэтая праблема застаецца неразвязанай нават пасля візіту ў Пекін прэзідэнта Уладзіміра Пуціна.

Атрымаць плацеж з КНР, нават у юанях, стала вельмі складана, а ў некаторых выпадках немагчыма, расказвалі Bloomberg топ-мэнэджары некалькіх буйных расейскіх экспарцёраў. Паводле словаў крыніцаў агенцтва, аплатная блакада закранула вытворцаў металаў, кампаніі сельгассектару, а таксама іншыя галіны.