УСУ перайшлі ў наступ на Харкаўшчыне: унікальныя кадры

• 31.08.2024, 21:22

Прарыў украінскіх сіл адбываўся нягледзячы на колькасную перавагу ворага.

15 жніўня ўкраінскія падраздзяленні перайшлі ў контрнаступ і прасунуліся ўглыб на 2 кіламэтры, заняўшы батальённы абшар абароны супраціўніка, паведамляе «24 канал».

Вядома, што прарыў украінскіх сіл адбываўся нягледзячы на перавагу ворага ў прапорцыі 2,5 да 1.

Акрамя прасоўвання, ваяры здалелі нанесці акупантам вялікія страты. Яны "пазбавіліся" прыкладна трох сотняў вайскоўцаў. Значная колькасць тэхнікі і ўзбраення разбітая або пашкоджаная.

У Трэцяй асобнай штурмавой брыгадзе паказалі эксклюзіўныя кадры з актыў-камер байцоў 1-га механізаванага і штурмавога батальёнаў.

"Так пачынаўся наступ Трэцяй штурмавой брыгады", — гаворыцца ў нататцы абаронцаў.

На кадрах відаць, як пяхота знішчае варожыя бліндажы. Агнявымі накатамі рвецца да акопнай лініі ворага. Супраціўнік ладзіць лютае супраціўленне і спрабуе атачыць штурмавыя групы.

Дарэчы, расейцы ўвесь час спрабуюць вярнуць страчаныя на Харкаўшчыне пазіцыі і кідаюць туды ўсё больш новых рэсурсаў.