Расіяне ўронілі авіябомбу і ўчынілі блэкаўт у Белгарадзе
- 6.12.2025, 19:57
Выбух пакінуў заўважную варонку.
Увечары 6 снежня ў раёне электрападстанцыі на вуліцы Старажавай ва Усходняй акрузе Белгарада адбыўся выбух, пасля чаго частка абласнога цэнтра, а таксама прыгарад засталіся без электрычнасці. Як паведамляе «Пепел», адбылося нештатнае скіданне авіяцыйнай бомбы з расійскага баявога самалёта.
Згодна з падлікамі Astra, гэта ўжо як мінімум 133-я авіябомба, якую расійскія знішчальнікі ўронілі на кантраляванай РФ прыгранічнай тэрыторыі з пачатку года.
«Пепел» адзначае, што перад выбухам у Белгарадзе не спрацавала трывога ракетнай небяспекі і не было папярэджанняў пра небяспеку беспілотнікаў, што сведчыць пра падзенне расійскага снарада. Як расказалі жыхары дамоў у раёне падзення авіябомбы, перад здарэннем яны чулі гул самалёта, што ляцеў да мяжы. Выбух пакінуў заўважную варонку недалёка ад падстанцыі на вуліцы Старажавай. Месца ўдару было ачэплена, на месцы працуюць экстрэнныя службы. Белгарадскі губернатар пацвердзіў факт адключэння электрычнасці і заявіў, што прычына надзвычайнай сітуацыі — «прылёт неўстаноўленага боепрыпасу». Паводле яго слоў, у выніку выбуху пацярпеў адзін чалавек.
«Дагэтуль у частцы Белгарада і Белгарадскай акругі назіраюцца праблемы з падачай электраэнергіі. Мужчыну, які пацярпеў у Белгарадзе, брыгада хуткай дапамогі дастаўляе для абследавання ў гарадскую бальніцу № 2 г. Белгарада з папярэднім дыягназам «баротраўма», — напісаў кіраўнік рэгіёна ў тэлеграм-канале. Акрамя гэтага, быў пашкоджаны грузавы аўтамабіль, а ў двух прыватных дамах выбіла вокны.
У самім Белгарадзе пэўны час у шэрагу раёнаў адсутнічала электразабеспячэнне. У мясцовых пабліках паведамлялі пра перабоі, у тым ліку і ў цэнтры горада. Там часткова адключыліся святлафоры.
З пачатку года расійскія самалёты ў прыгранічнай зоне Расіі і на акупаванай частцы Украіны ўжо як мінімум уронілі 133 авіябомбы (ФАБы і УМПБ), а таксама тры ракеты, падлічвала Astra. За мінулы год на гэтыя тэрыторыі ўпалі прынамсі 165 ФАБаў.