ВПС Ізраіля нанеслі ўдар па сталіцы Емена

• 24.08.2025, 21:41

Сярод пашкоджаных аб'ектаў вайсковы комплекс у раёне прэзідэнцкага палаца.

Знішчальнікі Войска абароны Ізраіля (ЦАХАЛ) нанеслі серыю ўдараў па цэлях хусітаў у сталіцы Емена — Сане.

Са звестак прэс-службы войска, сярод пашкоджаных аб'ектаў вайсковы комплекс у раёне прэзідэнцкага палаца, дзве электрастанцыі і паліўнае сховішча. У ЦАХАЛ падкрэслілі, што ўсе гэтыя аб'екты выкарыстоўваліся «для вайсковай дзейнасці тэрарыстычнага рэжыму хусітаў».

Як удакладнілі ў ізраільскім войску, аперацыя стала адказам на рэгулярныя атакі з боку еменскіх паўстанцаў: у апошнія дні групоўка запускала ў бок Ізраіля ракеты «зямля-зямля» і беспілотнікі. У ЦАХАЛ таксама падкрэслілі, што хусіты дзейнічаюць пад кіраўніцтвам і пры падтрымцы Ірана.