Трамп паставіў Пуціну новы двухтыднёвы ўльтыматум

• 25.08.2025, 21:28

Прэзідэнт ЗША чарговым разам прыстрашыў "вельмі вялікімі наступствамі" за працяг вайны.

Прэзідэнт ЗША Дональд Трамп папярэдзіў Расею аб магчымых "вялікіх наступствах", калі яна не спыніць вайну супраць Украіны.

Падчас прэс-канферэнцыі ў Авальным кабінеце ў панядзелак, 25 жніўня, Трамп заявіў, што ён "рашуча ўмяшаецца", калі пагадненне аб спыненні баявых дзеянняў не будзе заключана на працягу найбліжэйшых двух тыдняў, паведамляе CNN.

"Паглядзім, што адбудзецца цягам наступнага тыдня ці двух, і тады я ўмяшаюся. Калі мне давядзецца быць там, я буду там, і мы альбо заключым пагадненне, альбо не", - сказаў ён.

Трамп таксама дадаў, што паміж расейскім дыктатарам і прэзідэнтам Украіны існуе "велізарная непрыязнасць". У той жа час ён падкрэсліў, што хоча, каб Уладзімір Пуцін і Уладзімір Зяленскі сустрэліся.

"Паміж гэтымі двума прэзідэнтамі ёсць вялізная асабістая непрыязнасць, і нам давядзецца гэта выправіць. Але я хацеў бы, каб яны спачатку сустрэліся. Яны жадаюць, каб я быў там. Магчыма, я буду там, а магчыма, не. Паглядзім", - сказаў амерыканскі прэзідэнт.

Раней Трамп заявіў, што зноў размаўляў з расейскім дыктатарам Уладзімірам Пуціным пасля іх гутаркі ў мінулы панядзелак — і даў зразумець, што ён "расчараваны" расейскімі атакамі, якія працягваюцца ва Украіну.

Таксама амерыканскі прэзідэнт уважае, што Пуцін пазбягае сустрэчы з украінскім прэзідэнтам Уладзімірам Зяленскім, бо ён яму не падабаецца.