Міністр унутраных спраў Польшчы падпісаў пастанову аб поўным закрыцці мяжы з Беларуссю

• 10.09.2025, 21:46

Памежныя пераходы закрыюць 12 верасня.

Міністр унутраных спраў і адміністрацыі Польшчы Марцін Кервінскі у сераду падпісаў пастанову аб часовым прыпыненні памежнага руху з Беларуссю, што было анансавана напярэдадні.

Пра гэта паведаміла Памежная служба Польшчы.

Рашэнне аб закрыцці памежных пераходаў з Беларуссю ўступіць у сілу з поўначы 12 верасня «да адмены» і будзе дзейнічаць у абодвух напрамках — як на выезд з Польшчы, так і на ўезд, гаворыцца ў паведамленні.

Польскія памежнікі дадалі, што закрыццё мяжы з’яўляецца адказам Варшавы на расійска-беларускія вучэнні «Захад-2025» і паклікана абараніць бяспеку мяжы Польшчы, якая адначасова з’яўляецца знешняй мяжой ЕС.

«Мы адкрыем пераходы, калі будзем упэўненыя, што сітуацыя не ўяўляе для нас ніякай пагрозы», — сказаў міністр унутраных спраў і адміністрацыі Польшчы Марцін Кервінскі.

Пра закрыццё мяжы з Беларуссю напярэдадні абвясціў прэм’ер-міністр Польшчы Дональд Туск.