Neuralink рыхтуе нейрачыпы для пераўтварэння думак у тэкст

• 21.09.2025, 18:48

Выпрабаванні пройдуць у ЗША і будуць накіраваныя на дапамогу людзям з парушэннямі маўлення.

Кампанія Ілона Маска Neuralink у кастрычніку пачне клінічныя выпрабаванні тэхналогіі, якая дазваляе ператвараць думкі ў тэкст з дапамогай мазгавых імплантаў. Пра гэта паведамляе Bloomberg.

Выпрабаванні пройдуць у ЗША і будуць накіраваныя на дапамогу людзям з парушэннямі маўлення. У выпадку поспеху прылада зможа забяспечыць ім магчымасць паўнавартасных зносін. Першае масавае ўкараненне імплантаў Neuralink запланавана на 2030 год.

Прылада павінна счытваць маўленчыя сігналы непасрэдна з мозгу чалавека. Упраўленне па санітарным наглядзе за якасцю харчовых прадуктаў і медыкаментаў ЗША (FDA) ўжо дало кампаніі дазвол на правядзенне выпрабаванняў.

Раней Neuralink прадставіла планы па адкрыцці ў ЗША пяці клінік, дзе пацыенты змогуць атрымаць доступ да трох тыпаў імплантаў: для аднаўлення зроку, запаволення нейрадэгенератыўных захворванняў і кіравання камп'ютарам сілай думкі. Да 2031 года кампанія разлічвае штогод імплантаваць да 20 тысяч нейрачыпаў.

Па дадзеных СМІ, ужо каля дзесяці пацыентаў прынялі ўдзел у клінічных выпрабаваннях, ім імплантавалі прылады ў межах праграмы маніторынгу бяспекі і эфектыўнасці тэхналогіі.