ЕС мае намер поўнасцю забараніць прадастаўленне марскіх паслуг Расіі

• 29.01.2026, 23:55

Каб заблакаваць «ценявы флот» Пуціна.

Еўрапейскі Саюз плануе ўвесці поўную забарону на прадастаўленне марскіх паслуг Расіі ў межах новага, 20-га пакета санкцый. Пра гэта заявіла вярхоўная прадстаўніца ЕС па замежных справах Кая Калас, паведамляе «Еўрапейская праўда». Па словах Калас, пакет, які плануецца прыняць 24 лютага, таксама ўключыць меры ў энергетычнай сферы і ў гандлі ўгнаеннямі.

Міністр замежных спраў Францыі Жан-Ноэль Барро ўдакладніў, што санкцыі будуць утрымліваць «асабліва жорсткія меры» менавіта супраць «ценявога флоту». Мэта гэтых абмежаванняў — поўнасцю заблакаваць перамяшчэнне расійскіх «ценявых» суднаў, дадаў Барро.

Гэтыя заявы прагучалі пасля таго, як 27 студзеня 14 краін Балтыйскага і Паўночнага мораў, уключаючы Вялікабрытанію, Францыю, Германію і скандынаўскія дзяржавы, апублікавалі сумесную заяву. У ёй яны папярэдзілі, што маюць намер перашкаджаць дзейнасці танкераў «ценявога флоту», якія Расія выкарыстоўвае для абыходу нафтавых санкцый. Судны без выразнай нацыянальнай прыналежнасці будуць лічыцца «суднамі без грамадзянства», што дае права прыбярэжным краінам іх затрымліваць і даглядаць, вынікае з дакумента.

На практыцы некаторыя краіны ўжо пачалі дзейнічаць. Так, на мінулым тыдні караблі ВМС Францыі затрымалі танкер Grinch, які, паводле даных французскіх уладаў, ішоў з Расіі пад ілжывым сцягам. Улады Германіі не ўпусцілі ў Балтыйскае мора не зарэгістраваны ні ў адной базе даных танкер Arcusat, які накіроўваўся ў Фінскі заліў. Пасля гэтага два іншыя танкеры, што вывозілі нафту з Мурманска, развярнуліся ля берагоў Нарвегіі і пайшлі назад, піша Bloomberg.

Прэзідэнт Францыі Эманюэль Макрон 28 студзеня пацвердзіў рашучасць узмацніць ціск на Расію і працягваць працу па абмежаванні дзейнасці «ценявога флоту». У ЕС пакуль няма канчатковай згоды па ўсіх пунктах новага санкцыйнага пакета, але, як адзначыла Кая Калас, праца над ім актыўна вядзецца.