Блогер распавёў пра беларускія сельсаветы ў Сібіры

• 10.10.2026, 6:44

Беларускамоўных школ і факультэтаў там было больш, чым у сучаснай Беларусі.

Блогер, які часта піша пра невядомыя старонкі гісторыі нашай краіны, распавёў, як у Сібіры з’явіліся буйныя беларускія супольнасці.

«Да вайны ў Сібіры былі беларускія сельсаветы, з беларускімі школамі, у якіх навучанне вялося на беларускай мове. Яны трапілі туды да рэвалюцыі ў межах сталыпінскай рэформы», — напісаў ён.

Беларусы, што жывуць за Уралам, падцвердзілі словы блогера і распавялі пра тое, як іх продкі трапілі ў Сібір. Сайт Charter97.org прыводзіць іх словы:

- У Краснаярскім краі было шмат вёсак, заснаваных этнічнымі беларусамі, якія пайшлі ў Сібір па ўласнай волі, у межах сталыпінскай рэформы. Мая маці з такой вёскі, этнічная беларуска. Яе бабулі размаўлялі на чымсьці кшталту трасянкі, сумесі рускай і беларускай мовы.

- Я з Краснаярска, у мяне прабабуля беларуска; мая бабуля і яе сёстры часам паміж сабой ужываюць у размове беларускія словы, кажуць: так мама размаўляла. Акрамя беларусаў, у нас яшчэ шмат каго. У маміным пасёлку — нашчадкі рэпрэсаваных фінаў і яўрэяў, у бацькавым — немцы, латышы, літоўцы, украінцы, крымскія грэкі. Таму ў Краснаярскім краі такая сумесь.

- Я нядаўна была ў Краснаярску і заўважыла, як моцна людзі там падобныя да беларусаў. Увесь час вельмі здзіўлялася, бо дзе Сібір, а дзе Беларусь. А нядаўна даведалася, што ў Сібіры да вайны былі перасяленцы з Беларусі, вялося навучанне на беларускай мове.