Цягнік Мінск — Анапа з-за удараў дронаў змяняе маршрут

• 10.10.2026, 13:29

Пашкоджаная чыгуначная дарога на ўчастку Бранск — Унеча — Гомель.

У Бранскай вобласці Расіі з-за удараў дронаў парушана чыгуначнае паведамленне па маршруце Бранск — Унеча — Гомель. Таму цягнік Мінск — Анапа накіруюць у аб'езд, паведаміў 10 кастрычніка губернатар Бранскай вобласці Ягор Кавальчук.

Паводле слоў губернатара, быў атакаваны чыгуначны мост у Выгоніцкім раёне, пашкоджаныя рэйкі. Відаць, гаворка пра «Блакітны мост» праз Дзясну на 34−35 кіламетрах лініі Бранск — Гомель, піша «Зеркало».

«Парушана чыгуначнае паведамленне па маршруце Бранск-Унеча-Гомель. <�…> Цягнік Мінск-Анапа будзе накіраваны па Смаленскім напрамку да станцыі Бранск-Арлоўскі і назад», — паведаміў Кавальчук.

Нагадаем, расійская чыгуначная інфраструктура на памежнай з Беларуссю Браншчыне знаходзіцца пад ударамі дронаў. Так, паведамлялася, што 29 верасня быў атакаваны перагон Тросна — Ржаніца. У той жа дзень БелЖД паведаміла, што «па тэхнічных прычынах» у маршрут і расклад руху цягніка № 301 Адлер — Мінск уносяцца змены.

Да таго пад удар трапіла станцыя Унеча, праз якую ў Беларусь ідуць цягнікі з курортных Анапы і Адлера — БелЖД ужо інфармавала 28 верасня пра перанакіраванне складу з Анапы. А 9 кастрычніка — з Адлера.