У расіян узнікла праблема з Крымскім мостам
- 10.10.2026, 15:16
У ВМС Украіны патлумачылі, чаму яго не дабіваюць.
Крымскі мост пасля трох атак Сіл абароны працуе з шматлікімі абмежаваннямі і больш не выконвае сваю асноўную функцыю. Грузавікі на пераправу не прапускаюць, а паліва і цяжкую браняваную тэхніку па ёй не перавозяць, хоць напярэдадні Расія ўзмацніла абарону моста на моры. Пра гэта заявіў прэс-сакратар ВМС ЗСУ Дмитрий Плетенчук у эфіры «24 Канал».
Паводле слоў Плетенчука, мост «дастаткова пашкоджаны». У той жа час Расія ўжо страціла тысячы грузавікоў на сухапутным калідоры праз акупаваныя паўднёвыя тэрыторыі Украіны, таму лагістыка акупантаў у Крым апынулася пад ціскам з двух напрамкаў.
«Ён не выконвае сваю асноўную функцыю», — падкрэсліў прадстаўнік ВМС.
Чаму расіяне абмежавалі рух па мосце
Плетенчук назваў дзве версіі таго, чаму грузавы рух па пераправе фактычна спынены. Першая — тэхнічныя праблемы, якія ўзніклі ў канструкцыі пасля шэрагу ўдараў, і менавіта да яе схіляецца прэс-сакратар.
«Я схіляюся да таго, што там ужо ёсць тэхнічныя праблемы пасля шэрагу атак», — сказаў Плетенчук.
Другая версія палягае ў тым, што расіяне баяцца паўторных удараў, якія могуць яшчэ больш пашкодзіць мост. Яшчэ ў ліпені Плетенчук у каментарыі LIGA.net называў Керчанскі мост, мабыць, апошнім лагістычным інструментам, які будзе выкарыстоўваць вораг, і тлумачыў гэта менавіта пашкоджаннямі канструкцыі і страхам акупантаў перад знішчэннем грузаў проста на пераправе.
Чаму Сілы абароны не дабіваюць пераправу
Прадстаўнік ВМС нагадаў, што мост — складанае для знішчэння збудаванне. Для параўнання ён згадаў Антонаўскі мост, які не ўдалося знішчыць ударамі з вялікай адлегласці, — урэшце яго падарвалі з дапамогай вялікай колькасці выбухоўкі.
Акрамя таго, Крымскі мост — адзін з самых абароненых аб’ектаў праціўніка. Па ацэнцы Плетенчука, супрацьпаветраную абарону там можна параўнаць хіба што са СПА Масквы.
«Цяжка сказаць, што стратэгічная каштоўнасць Крымскага моста цяпер высокая. А вось сімвалічная каштоўнасць і «скрэпнасць» зашкальваюць. Але мы за гэтым не ганімся. Вядуцца атакі па сухапутным калідоры, якія ўскладняюць лагістыку ворага ў Крыме, на левым беразе Херсонскай вобласці», — падкрэсліў Плетенчук.