Маску варта задумацца аб бяспецы Starlink з-за дзеянняў Крамля

• 10.10.2026, 15:34

Пра гэта папярэдзіў нямецкі генерал Міхаэль Траўт.

Расійскія ваенныя спадарожнікі могуць уяўляць пагрозу для Starlink Ілона Маска нават без прамой атакі. Пра гэта заявіў кіраўнік Камандавання касмічных сіл Германіі генерал-маёр Міхаэль Траўт у інтэрв'ю Reuters (пераклад — сайт Charter97.org).

Прычынай для непакоенасці стаў інцыдэнт у маі, калі чатыры расійскія ваенныя спадарожнікі зблізіліся з камерцыйным апаратам фінскай кампаніі ICEYE. Яна прадастаўляе радыёлакацыйныя здымкі Украіне і яе саюзнікам для назірання за сітуацыяй на фронце. Паводле даных Касмічных сіл ЗША, расійскія апараты сачылі за спадарожнікам і манеўравалі побач з ім.

«Расія дэманструе магчымасці, якія, пры ўжыванні супраць такой буйной групоўкі, як Starlink, здольныя скараціць тэрмін службы спадарожнікаў і пагоршыць якасць сувязі для ўсіх карыстальнікаў», — заявіў Траўт.

Масква можа выкарыстоўваць тактыку ціску без адкрытага нападу. Напрыклад, расійскі спадарожнік здольны наблізіцца да апарата Starlink, а затым разбурыцца на арбіце. Каб пазбегнуць сутыкнення з абломкамі, спадарожнікам давялося б змяняць траекторыю і расходаваць паліва, скарачаючы тэрмін эксплуатацыі.

«Гэта мяне вельмі трывожыць», — падкрэсліў нямецкі генерал.

У ICEYE таксама лічаць, што інцыдэнт паказаў, наколькі блізка касмічныя апараты цяпер могуць збліжацца адзін з адным — як для назірання, так і для патэнцыйнага нанясення шкоды.

Расія не раскрывае магчымасцяў спадарожнікаў серыі «Космас», а Мінбароны РФ не адказала на пытанні Reuters. SpaceX таксама не пракаментавала сітуацыю.

Германія ў адказ на новыя пагрозы распрацоўвае спадарожнікі-інспектары і вывучае магчымасць стварэння арбітальных сродкаў супрацьдзеяння, здольных парушаць працу варожых апаратаў без іх знішчэння.