На Камароўцы знайшлі незвычайны беларускі батат

• 11.10.2026, 18:59

Цяплалюбівую культуру вырошчваюць у Мінскай вобласці пад плёнкай.

На Камароўцы можна знайсці батат, вырашчаны ў Беларусі. Прычым рознага колеру — жоўты, ружовы, чырвоны, фіялетавы, заўважыў «Смартпрэс».

Кошт такога батата вагаецца ад 12 да 18 рублёў за кілаграм. Некаторыя гатункі больш салодкія, іншыя маюць гароднінны прысмак. Больш дарагія, фіялетавыя, таксама маюць фіялетавы колер мякаці.

«Бяруць і цікавяцца, так, — распавядае прадавец. — Прычым бяруць не толькі беларусы, але і госці з іншых краін, асабліва азіяцкіх. Кажуць, робяць з яго шмат страў — ад гарніраў да смузі».

Батат вырошчваюць у Мінскай вобласці, гэтай культурай займаюцца не першы год.

«Культура цяплалюбівая, даводзіцца трымаць яе пад плёнкай, але ў астатнім — не надта і капрэзная».

На рынку можна знайсці і грыбы. Баравікі па 60‑100 рублёў за 1 кг, падасінавікі па 40 рублёў за 1 кг, лісічкі па 12 рублёў за 1 кг.